India vs West Indies Test : మరికొద్ది గంటల్లో విండీస్-భారత్ మహా పోరుకు తెరలేవనుంది. బుధవారం (జులై 12) సాయంత్రం 7:30కి డొమినికా వేదికగా మొదటి టెస్టు ప్రారంభం కానుంది. చివరి సారిగా 2019లో విండీస్ పర్యటనకు వెళ్లిన టీమ్‌ఇండియా.. దాదాపు నాలుగేళ్ల తర్వాత వెస్టిండీస్తో టెస్టు సిరీస్‌కు సిద్ధమైంది. గతేడాది భారత్‌కు విండీస్ వచ్చినప్పటికీ టెస్టు సిరీస్ మాత్రం ఆడలేదు. అయితే ఈ సారి రోహిత్ శర్మ సారథ్యంలోని టీమ్‌ఇండియా ఫేవరేట్‌గా బరిలోకి దిగుతోంది.
భారత్ పైచేయి..
India vs West Indies Test Series History : గత 21 ఏళ్లుగా ఇరు దేశాల జట్ల మధ్య మొత్తం ఎనిమిది సిరీస్‌లు జరిగాయి. వీటన్నింటిలో టీమ్‌ఇండియానే విజయం సాధించడం విశేషం. చివరిసారిగా భారత్పై వెస్టిండీస్ 2001/2002 సీజన్‌లో టెస్టు సిరీస్‌ను గెలుచుకుంది. ఆ తర్వాత ఒక్కసారి కూడా విండీస్ భారత్పై పైచేయి సాధించలేకపోయింది.
India vs West Indies All Match Result : ఇక ఇప్పటివరకు ఇరు జట్లూ కలిపి మొత్తం 98 టెస్టు మ్యాచులాడాయి. వీటిల్లో భారత్ (22), విండీస్ (30) విజయాలతో ఆధిపత్యంలో ఉంది. కరేబియన్‌ మైదానంలో 51 మ్యాచుల్లో తలపడగా.. విండీస్ 16 విజయాలు, భారత్ 9 విజయాలను నమోదు చేసింది. మరో 26 మ్యాచ్లు డ్రాగా ముగిశాయి. సిరీస్‌ల గణంకాల ప్రకారం.. విండీస్-భారత్ జట్ల మధ్య 24 టెస్ట్ సిరీస్‌లు జరిగాయి. ఇందులో 12 సిరీస్‌లను వెస్టిండీస్ సొంతం చేసుకోగా.. భారత్ 10 సిరీస్‌లను గెలుచుకుంది. మరో రెండు మ్యాచ్లు డ్రాగా ముగిశాయి.
2000వ సంవత్సరం ముందు వరకు విండీస్ క్రికెట్ జట్టు సత్తా, ఆధిపత్యం ప్రపంచానికి తెలుసు. ఆ సమయంలో ఆ జట్టుపై విజయం సాధించడమంటే ఆషామాషీ వ్యవహారం కాదు. అయినప్పటికీ భారత్ రెండుసార్లు సిరీస్‌ను దక్కించుకుంది. అయితే 2002-2003 సీజన్‌ నుంచి విండీస్తో ఆడిన అన్ని సిరీస్‌లను భారత్ క్లీన్ స్వీప్ చేస్తూ వస్తుంది.
భారత్ పాంచ్ పటాకా..
- ట్రినిడాడ్‌ అండ్‌ టుబాగో వేదికగా 2016లో జరిగిన మ్యాచ్ డ్రాగా ముగిసింది. అది కూడా వర్షం పడటంతో మ్యాచ్ ఫలితం డ్రాకు దారితీసింది. నాలుగు టెస్టుల సిరీస్‌ను భారత్ 2-0 తేడాతో సొంతం చేసుకుంది.
- 2018లో హైదరాబాద్‌ వేదికగా జరిగిన మ్యాచ్‌లో టీమ్‌ఇండియా విండీస్‌పై 10 వికెట్ల తేడాతో గ్రాండ్ విక్టరీ నమోదు చేసింది.
- 2018లో రాజ్‌కోట్‌లో జరిగిన మ్యాచ్‌లోనూ విజయం భారత్‌నే వరించింది. విండీస్‌పై ఏకంగా ఇన్నింగ్స్ 272 పరుగుల భారీ స్కోర్ తేడాతో గెలుపొందడం విశేషం.
- 2019లో భారత్-వెస్టిండీస్ మధ్య జమైకా వేదికగా జరిగిన మ్యాచ్‌లో టీమ్‌ఇండియా 257 పరుగుల తేడాతో గెలిచింది.
- 2019లో అంటిగ్వా మైదానంలో జరిగిన మ్యాచ్‌లోనూ విండీస్‌పై భారత్ 318 పరుగుల భారీ తేడాతో గెలుపొందింది.
టెస్టుల్లో అత్యధిక పరుగుల చేసిన బ్యాటర్లు..
| పేరు | మ్యాచులు | ఇన్నింగ్స్ | పరుగులు |
| సునీల్ గావస్కర్ | 27 | 48 | 2749 |
| క్లైవ్‌లాయిడ్(విండీస్) | 28 | 44 | 2344 |
| శివ్‌నారాయణ్‌ చంద్రపాల్(విండీస్) | 25 | 44 | 2171 |
| రాహుల్‌ ద్రవిడ్‌ | 23 | 38 | 1978 |
| వివియన్‌ రిచర్డ్స్‌(విండీస్) | 28 | 41 | 1927 |
అత్యధిక వికెట్ల వీరులు..
| ప్లేయర్ | మ్యాచులు | వికెట్లు |
| కపిల్‌ దేవ్ | 25 | 89 |
| మాల్కమ్ మార్షల్‌ (విండీస్) | 17 | 76 |
| అనిల్‌ కుంబ్లే | 17 | 74 |
| ఎస్‌ వెంకట రాఘవన్ | 23 | 68 |
| ఆండీ రాబర్ట్స్‌ (విండీస్) | 14 | 67 |
