సచిన్ ప్రపంచ క్రికెట్ లోకానికి దేవుడు. క్రికెట్ దిగ్గజం సచిన్ తెందుల్కర్కు ఉన్న కోట్లాది మంది అభిమానుల్లో ఒక అభిమాని మాత్రం చాలా ప్రత్యేకం. సచిన్ ఆడుతుంటే చూసేందుకు తన వ్యక్తిగత జీవితాన్ని కూడా త్యాగం చేసిన ఆ వీరాభిమానే సుధీర్‌కుమార్‌ చౌదరీ. సుధీర్ అంటే తెలియని వాళ్లు బహుశా భారత క్రికెట్ అభిమానుల్లో ఎవ్వరూ ఉండకపోవచ్చు.
సచిన్ మ్యాచ్లు చూసేందుకు ఆస్తులు సైతం..
సచిన్ రిటైర్మెంట్‌ వరకు టీమ్ఇండియా ఆడిన ప్రతి మ్యాచ్‌లో సుధీర్ స్టాండ్స్‌లో దర్శనమిచ్చే వాడు. సచిన్ ఆడిన ప్రతి మ్యాచ్‌ను చూసేందుకు ఆస్తులను సైతం అమ్ముకున్నాడు. శరీరాన్ని మొత్తం భారతీయ జెండాలోని త్రివర్ణ రంగులతో నింపుకొని ఛాతీపై సచిన్ తెందుల్కర్ జెర్సీ నెంబర్‌ ముద్రించుకొని చేతిలో జాతీయ జెండాను పూని టీమ్ఇండియా ఎక్కడ మ్యాచ్లు ఆడితే అక్కడికి ఒక సైకిల్‌పైనే వెళ్లి మ్యాచ్‌లను చూసేవాడు.
ఆరేళ్ల వయసులోనే..
ఆరేళ్ల వయసులోనే సచిన్‌కు వీరాభిమానిగా మారిపోయిన సుధీర్ కుమార్‌ చౌదరీ.. 14 ఏళ్ల వయసులో చదువు వదిలేశాడు. కొన్నాళ్లు టీచర్‌గా పనిచేశాడు. తన జీవితం క్రికెట్ మ్యాచ్‌లకే అంకితమని తీర్మానం చేసుకున్న సుధీర్.. పబ్లిక్‌ సపోర్ట్‌తో వచ్చిన డబ్బులతో స్టేడియానికి వెళ్లి మ్యాచ్‌లను చూసేవాడు. చాలాసార్లు వందల కిలోమీటర్లు సైకిల్పై వెళ్లి సచిన్ మ్యాచ్‌లను చూసేవాడు.
పాకిస్థాన్లో మ్యాచ్ జరిగినా సైకిల్పై..
పాకిస్థాన్, బంగ్లాదేశ్‌ల్లో భారత్‌ ఆడిన సిరీస్‌లకు సైకిల్‌పైనే వెళ్లడం సచిన్‌పై అతడికున్న అభిమానానికి నిదర్శనం. 2011, ఏప్రిల్‌ 2న.. టీమ్ఇండియా వన్డే వరల్డ్‌కప్‌ గెలిచిన రోజు భారత్‌ డ్రెస్సింగ్‌ రూమ్‌లో సంబరాలకు సచిన్ సుధీర్ చౌదరీని ఆహ్వానించి గౌరవించాడు.
సచిన్‌ను మెప్పించిన అభిమాని.. పోలీసుల క్షమాపణ
2010లో కాన్పూర్‌ వేదికగా టీమ్ఇండియా మ్యాచ్ ఆడేందుకు వచ్చింది. అయితే ప్రాక్టీస్‌సెషన్‌ సమయంలో సచిన్తో కరచాలనం చేయడానికి సుధీర్ కుమార్‌ ప్రయత్నించాడు. కానీ పోలీసులు సుధీర్ పట్ల కాస్త దురుసుగా ప్రవర్తించి చేయి చేసుకున్నారు. ఇది గమనించిన సచిన్ నేరుగా పోలీసుల వద్దకు చేరుకొని.. అతడు నా వీరాభిమాని.. అతడు నాకు ఫ్యాన్ కాదు.. నేనే అతడి ఫ్యాన్‌ను అని చెప్పాడు.
సచిన్ తర్వాత ధోనీ..
సచిన్ రిటైర్మెంట్‌ తర్వాత కొన్నాళ్ల పాటు ధోనీ అభిమానిగా మారిన సుధీర్.. పలు మ్యాచ్లకు అతడి జెర్సీ నెంబర్‌ ముద్రించుకొని వచ్చాడు. కానీ ఇటీవల భారత్‌ ఆడే మ్యాచ్‌ల్లో సుధీర్ పూర్తిగా కనిపించడం లేదు. సచిన్ 50వ జన్మదినం సందర్భంగా సచిన్‌కు ప్రత్యేక బహుమతి ఇచ్చి మరీ సుధీర్ మరోసారి తనకున్న అపరిమితమైన అభిమానాన్ని చాటుకున్నాడు.
ఆసీస్లో అరుదైన ఘనత..
సచిన్ తెందుల్కర్కు ఆస్ట్రేలియా గడ్డపై ఓ అరుదైన గౌరవం దక్కింది. సోమవారం తన 50వ బర్త్డే జరుపుకుంటున్న సందర్భంగా సిడ్నీ క్రికెట్ గ్రౌండ్ (ఎస్సీజీ).. స్టేడియంలో తెందుల్కర్ పేరు మీద గేట్లను ఆవిష్కరించింది. తెందుల్కర్తో పాటు వెస్టిండీస్ లెజెండ్ బ్రెయిన్ లారా పేర్లతో గేట్లను ఆవిష్కరిస్తున్నట్లు ఎస్సీజీ ప్రకటించింది. "బ్రెయిన్ లారా - సచిన్ తెందుల్కర్ గేట్స్" అంటూ నామకరణం చేసింది. ఇకపై ఈ గ్రౌండ్స్లో జరిగే మ్యాచ్లకు హాజరయ్యే ఆటగాళ్లందరూ ఈ గేట్ల నుంచే ప్రవేశించనునున్నట్లు ఎస్సీజీ పేర్కొంది.
