కొవిడ్ కారణంగా దేశవాళీ టోర్నమెంట్ రంజీ ట్రోఫీని నిలిపివేస్తూ ఇటీవలే కీలక నిర్ణయం తీసుకుంది భారత క్రికెట్ నియంత్రణ మండలి(బీసీసీఐ). అయితే.. ఈ టోర్నీని తిరిగి ప్రారంభించేందుకు శాయశక్తులా కృషిచేస్తామని బీసీసీఐ అధ్యక్షుడు సౌరవ్ గంగూలీ పేర్కొన్నాడు.
"కొవిడ్ వ్యాప్తి దారుణంగా పెరుగుతోంది. చాలా జట్లలో ఆటగాళ్లకు, సిబ్బందికి పాజిటివ్గా నిర్ధరణ అయింది. ఆటగాళ్లకు, అధికారులకు, మ్యాచ్ నిర్వాహకులకు ఇది ఇబ్బందికరమైన అంశం. ఈ నేపథ్యంలో టోర్నీ వాయిదా వేయాల్సి వచ్చింది."
--సౌరవ్ గంగూలీ, బీసీసీఐ.
కొవిడ్ పరిస్థితులు అదుపులోకి వచ్చాక ఈ టోర్నీ నిర్వహణకు బీసీసీఐ శక్తిమేర ప్రయత్నిస్తుందని గంగూలీ చెప్పాడు. రంజీ ట్రోఫీ కోసం మిగతా టోర్నీలు వాయిదా పడతాయని పేర్కొన్నాడు. త్వరలోనే బీసీసీఐ మరో ప్రణాళిక సిద్ధం చేస్తుందని వెల్లడించాడు. పలు టీమ్ల అధ్యక్షులకు, సెక్రటరీలకు పంపిన మెయిల్లో ఈ అంశాలను ప్రస్తావించాడు గంగూలీ.
జనవరి 13 నుంచి రంజీ ట్రోఫీ ప్రారంభం కావాల్సి ఉంది. కానీ, పలువురు ఆటగాళ్లు, సిబ్బంది కొవిడ్ బారినపడిన కారణంగా టోర్నీని వాయిదా వేసింది బీసీసీఐ. బంగాల్ జట్టులో చాలా మందికి వైరస్ సోకగా, ముంబయి ఆల్రౌండర్ శివమ్ దూబే కూడా కొవిడ్ బారినపడ్డాడు.
ఇదీ చదవండి:
Ranji trophy 2021: రంజీ ట్రోఫీ గ్రూప్స్పై బీసీసీఐ ప్రకటన
రంజీ ట్రోఫీలో కరోనా కలకలం.. శివమ్ దూబెకు కరోనా
