ఇంగ్లాండ్ సిరీస్ ముందు టీమ్ఇండియాను గాయాలు కుదిపేస్తున్నాయి. తాజాగా.. టెస్టు సిరీస్ నుంచి టీమ్ఇండియా ఆల్రౌండర్ వాషింగ్టన్ సుందర్ తప్పుకున్నాడు. చేతి వేలి గాయం కారణంగా అతడు టోర్నీ నుంచి తప్పుకున్నట్లు బీసీసీఐ వర్గాలు వెల్లడించాయి.
"వాషింగ్టన్ సుందర్ చేతి వేలికి గాయమైంది. దాని నుంచి కోలుకునేందుకు దాదాపుగా 6 వారాల సమయం పట్టే అవకాశం ఉంది. దీంతో ఇంగ్లాండ్తో జరగనున్న టెస్టు సిరీస్లో సుందర్ ఆడే అవకాశం లేద"ని బీసీసీఐ వర్గాలు వెల్లడించాయి.
కాలి గాయం కారణంగా ఇప్పటికే సిరీస్కు దూరమైన ఓపెనర్ శుభ్మన్ గిల్ మంగళవారం భారత్ చేరుకున్నాడు. దుర్హమ్లో జరుగుతున్న వార్మప్ మ్యాచ్లో గాయం కారణంగా రిజర్వ్ పేసర్ ఆవేశ్ ఖాన్ కూడా సిరీస్ నుంచి నిష్క్రమించాడు. అయితే ఈ రిజర్వ్ పేసర్పై భారత క్రికెట్ నియంత్రణ మండలి(బీసీసీఐ) ప్రకటించాల్సి ఉంది. కౌంటీ టీమ్తో ఆడుతున్న వార్మప్ మ్యాచ్ తొలి రోజు ఆవేశ్ ఖాన్కు గాయమైన కారణంగా.. అతడ్ని మెడికల్ సిబ్బంది పర్యవేక్షిస్తున్నారని బీసీసీఐ బుధవారం వెల్లడించింది.
మరోవైపు నడుం నొప్పి కారణంగా వార్మప్ మ్యాచ్కు దూరంగా ఉన్న టీమ్ఇండియా కెప్టెన్ విరాట్ కోహ్లీ.. నెట్స్లో ప్రాక్టీస్ చేస్తూ కనిపించాడు. దీంతో అతడి గాయం ఊహించినంత పెద్దది కాదని తెలుస్తోంది. సౌకర్యవంతంగానే షాట్లు కొడుతున్నాడు. ఆగస్టు 4 నుంచి ఇంగ్లాండ్తో జరగనున్న తొలి టెస్టు నాటికి విరాట్ పూర్తి స్థాయిలో ఫిట్నెస్ సాధిస్తాడని టీమ్ ఆశిస్తోంది.
ఇదీ చూడండి.. భారత్తో టెస్టు సిరీస్.. జట్టును ప్రకటించిన ఇంగ్లాండ్
