Deepak Chahar IPL 2022: టీమిండియా పేసర్, చెన్నై సూపర్ కింగ్స్ ప్రధాన బౌలర్ దీపక్ చాహర్ మరో నాలుగు నెలల పాటు ఆటకు దూరం కానున్నాడు. తొడ కండరాల గాయం నుంచి కోలుకున్న అతను బెంగళూరులోని జాతీయ క్రికెట్ అకాడమీలో నెట్ ప్రాక్టీస్ చేస్తూ గాయపడ్డాడు. వెన్నునొప్పి ఎక్కువగా ఉన్నందున మరో నాలుగు నెలల పాటు రెస్ట్ తీసుకోవాలని వైద్యులు సూచించినట్లు తెలుస్తోంది.
ఇప్పటికే గాయం కారణంగా ఐపీఎల్ 2022 సీజన్ మొత్తానికి దురమయ్యాడు చాహర్. ఇప్పుడు ఈ ఏడాది జరిగే టీ20 ప్రపంచ కప్ 2022లోనూ అతడు ఆడటంపై నీలినీడలు కమ్ముకున్నాయి. ఆస్ట్రేలియాలో ఈ ఏడాది అక్టోబర్-నవంబర్ మధ్యలో ఈ లీగ్ జరగనుంది. నేషనల్ మీడియా కథనాల ప్రకారం.. తాజాగా తీసిన స్కాన్స్లో స్క్రాచెస్ ఉన్నాయని, మరో నాలుగు నెలల పాటు మైదానంలోకి అడుగుపెట్టకూడదని వైద్యులు సూచించినట్లు తెలుస్తోంది. దీని ప్రకారం 2022 టీ20 వరల్డ్ కప్కు చాహర్ దూరమయ్యే అవకాశాలే మెండుగా ఉన్నాయి.
తొడ కండరాల గాయం నుంచి కోలుకుని ఏప్రిల్ రెండో వారంలో జట్టులో చేరతాడని చెన్నై సూపర్ కింగ్స్ భావించింది. అయితే.. అతడు నెట్స్లో ప్రాక్టీస్ చేస్తుండగా వెన్నునొప్పికి గురయ్యాడు. దీంతో ఐపీఎల్ సీజన్ మొత్తానికి దూరమయ్యాడు. ఈ ఏడాది మెగా వేలంలో రూ.14 కోట్లు పెట్టి కొనుగోలు చేసిన ప్రధాన బౌలర్ సీజన్కు దూరమవటం సీఎస్కేకు తీరని లోటు. చాహర్ లేకుండానే బరిలోకి దిగిన చెన్నై.. వరుసగా నాలుగు మ్యాచ్లు ఓడిపోయింది. ఫిబ్రవరిలో వెస్టిండీస్తో మూడో టీ20 సందర్భంగా చాహర్ గాయపడ్డాడు. ఆ తర్వాత జరిగిన శ్రీలంక పర్యటనకూ దూరమయ్యాడు. భారీ షాట్లూ ఆడగల ఈ బౌలింగ్ ఆల్రౌండర్.. గతేడాది సీఎస్కే నాలుగోసారి టైటిల్ దక్కించుకోవడంలో కీలకపాత్ర పోషించాడు.
ఇదీ చూడండి: చెన్నైకి కోలుకోలేని దెబ్బ.. ఐపీఎల్ నుంచి అతడు ఔట్!
