ప్రపంచకప్ ఫైనల్లో న్యూజిలాండ్పై అద్భుత విజయం సాధించిన ఇంగ్లాండ్.. తొలిసారి కప్ను సొంతం చేసుకుంది. ఈ గెలుపునకు కారణమైన స్టోక్స్ను అందరూ ప్రశంసిస్తున్నారు. ఇప్పుడు మరో ఘనత అతడ్ని వరించే అవకాశముంది. 'న్యూజిలాండర్ ఆఫ్ ది ఇయర్' పురస్కారానికి స్టోక్స్ పేరును నామినేట్ చేశారు. కివీస్ కెప్టెన్ విలియమ్సన్ ఈ జాబితాలో చోటు దక్కించుకున్నాడు.
బెన్ స్టోక్స్ స్వస్థలం న్యూజిలాండ్లోని క్రైస్ట్చర్చ్. కానీ 12 ఏళ్ల వయసులోనే ఇంగ్లాండ్ వలస వెళ్లాడు. ఆ తర్వాత జట్టులో ప్రధాన క్రికెటర్గా మారాడు. ఇటీవలే జరిగిన ప్రపంచకప్లో ఇంగ్లీష్ జట్టు తరఫున అద్భుతంగా రాణించి, కప్ కొట్టడంలో తన మార్క్ చూపించాడు. టోర్నీ మొత్తంలో 465 పరుగులు చేసి 7 వికెట్లు పడగొట్టాడు. ఫైనల్లో 84 పరుగులతో ఇంగ్లాండ్ విజయంలో కీలక పాత్ర పోషించాడు.
'న్యూజిలాండర్ ఆఫ్ ది ఇయర్ అవార్డ్స్'కు చీఫ్ జడ్జ్గా వ్యవహరించిన కామెరాన్ బెన్నెట్.. స్టోక్స్ నామినేషన్పై స్పందించారు.
"అతడు కివీస్ తరఫున ఆడకపోవచ్చు. కానీ పుట్టింది న్యూజిలాండ్ క్రైస్ట్చర్చ్లోనే. స్టోక్స్ తల్లిదండ్రులు ఇప్పటికీ ఇక్కడే నివసిస్తున్నారు." -కామెరాన్ బెన్నెట్, అవార్డ్స్ చీఫ్ జడ్జ్
ప్రపంచకప్లో కివీస్ కెప్టెన్గా అత్యుత్తమ ప్రదర్శన చేసిన విలియమ్సన్.. ప్లేయర్ ఆఫ్ ది సిరీస్గా నిలిచాడు. ఇప్పుడు ఈ అవార్డ్స్కు సంబంధించి పలు నామినేషన్లు పొందాడు.
ఈ పురస్కారం కోసం మొత్తం 10 మంది పేర్లను ఈ ఏడాది డిసెంబరులో చెప్తారు. వచ్చే ఏడాది ఫిబ్రవరిలో జరిగే గాలా అవార్డ్స్ కార్యక్రమంలో 'న్యూజిలాండర్ ఆఫ్ ది ఇయర్' విజేత ఎవరో ప్రకటిస్తారు.
ఇది చదవండి: WC19: ప్రపంచకప్లో 'బెన్ స్టోక్స్' సూపర్ క్యాచ్
