అంతర్జాతీయ క్రికెట్కు అంబటిరాయుడు వీడ్కోలు పలికాడు. ఐపీఎల్ సహా అన్ని ఫార్మాట్ల నుంచి వైదొలుగుతున్నట్టు ప్రకటించాడు. ధావన్, విజయ్ శంకర్ గాయం కారణంగా ప్రపంచకప్కు దూరమవగా.. వారి స్థానంలో పంత్, మయాంక్ అగర్వాల్కు చోటు కల్పించింది సెలక్షన్ కమిటీ. నిరాశ చెందిన రాయుడు రిటైర్మెంట్ నిర్ణయం తీసుకున్నట్టు తెలుస్తోంది.
అంతర్జాతీయ క్రికెట్కు వీడ్కోలు పలుకుతున్నట్టు బీసీసీఐకి మెయిల్ పంపాడు రాయుడు.
"ఈ రోజు ఉదయం మేము రాయుడు మెయిల్ అందుకున్నాం. రిటైర్మెంట్ ప్రకటించినట్టు అందులో పేర్కొన్నాడు. తగిన కారణం అతడు తెలపలేదు. తాను ఆడిన అందరి కెప్టెన్లకు కృతజ్ఞతలు తెలిపాడు" -బీసీసీఐ ప్రతినిధి
బీసీసీఐ కక్ష సాధింపు చర్యా..!
ప్రపంచకప్కు 15 మందిని ఎంపిక చేసిన సెలక్షన్ కమిటీ.. రాయుడును జట్టులో తీసుకోలేదు. అతడి స్థానంలో విజయ్ శంకర్కు చోటు కల్పించింది. విజయ్ శంకర్ 3 డైమెన్షల్ ప్లేయర్ అని చీఫ్ సెలక్టర్ తన ఎంపికను సమర్ధించుకున్నారు. అయితే దీనిపై స్పందించిన రాయుడు.. అయితే 3డీ కళ్లద్దాలు ఆర్డర్ ఇచ్చానని వ్యంగ్యంగా ట్వీట్ చేశాడు. ఇది కాస్త సర్వత్రా చర్చనీయాంశమైంది.
ఈ ట్వీట్ అతడి కెరీర్పై ప్రభావం చూపింది. స్టాండ్ బై ఆటగాళ్ల జాబితాలో తన పేరు ఉన్నా.. రిషభ్ పంత్, మయాంక్ అగర్వాల్కు చోటు కల్పించిందే తప్ప రాయుడుకు అవకాశమివ్వలేదు. నాలుగో స్థానంలో నిలకడగా ఆడిన రాయుడు ఈ ఏడాది ఒక్క ఆసీస్ సిరీస్లోనే విఫలమయ్యాడు. ఇదే సాకుగా చూపి అతడిని వరల్డ్కప్లో ఎంపిక చేయనట్లు తెలుస్తోంది.
ప్రపంచకప్ కోసం ఫస్ట్క్లాస్కు గుడ్ బై ..
ప్రపంచకప్నకు సిద్ధమయ్యేందుకు ఫస్ట్క్లాస్ క్రికెట్కూ గత నవంబరులో రిటైర్మెంట్ ప్రకటించాడు. కానీ వరల్డ్కప్ జట్టులో అతడికి స్థానం దక్కలేదు. 2013లో జింబాబ్వేపై అంతర్జాతీయ వన్డేలో అరంగేట్రం చేసిన రాయుడు 55 మ్యాచ్ల్లో దేశానికి ప్రాతినిధ్యం వహించాడు. 47.05 సగటుతో 1655 పరుగులు చేశాడు. ఇందులో 3 సెంచరీలు, 10 అర్ధశతకాలు ఉన్నాయి. ఫస్ట్ క్లాస్ క్రికెట్లో 16 శతకాలు, 34 అర్ధ సెంచరీలతో 6151 పరుగులు చేశాడు.
ఈ ఐపీఎలే రాయుడుకు చివరిది..
2010లో ముంబయి ఇండియన్స్ తరఫున ఐపీఎల్ అరంగేట్రం చేసిన రాయుడు 3300 పరుగులు చేశాడు. అందులో ఓ శతకం, 18 అర్ధసెంచరీలు ఉన్నాయి. 2017 వరకు ముంబయి తరఫున ఆడిన ఈ తెలుగుతేజం 2018 నుంచి చెన్నై సూపర్ కింగ్స్కు మారాడు. అదే ఏడాది సీఎస్కే ఐపీఎల్ టైటిల్ సాధించడంలో కీలక పాత్ర పోషించాడు. ఆ సీజన్లో 602 పరుగులు చేశాడు. ప్రస్తుతం ఐపీఎల్ సహా అన్ని ఫార్మాట్లకు వీడ్కోలు పలికిన రాయుడుకు 2019 టోర్నీయే చివరిది.
ఆరంభం నుంచి వివాదాలే..
ముక్కుసూటిగా మాట్లాడే అంబటి రాయుడుకు తన కెరీర్ ఆరంభం నుంచి వివాదాలే చుట్టుముట్టాయి. 2004 అండర్-19 ప్రపంచకప్ జట్టుకు కెప్టెన్గా ఉన్న రాయుడు భారత్ను సెమీస్ వరకు తీసుకెళ్లాడు. అనంతరం ఫస్ట్ క్లాస్ క్రికెట్లో హైదరాబాద్ క్రికెట్ బోర్డుతో తలెత్తిన వివాదం కారణంగా.. ఆంధ్రా, బరోడా నుంచి ప్రాతినిథ్యం వహించాడు. స్టేట్ బోర్డుకు ఎదురుతిరిగి ఐసీఎల్తో మూడేళ్లు ఒప్పందం కుదుర్చుకుని జాతీయ జట్టు చోటు దక్కించుకోలేకపోయాడు. ప్రస్తుతం చీఫ్ సెలక్టర్ ఎమ్ఎస్కే ప్రసాద్, విజయ్ శంకర్ను ఉద్దేశించి 3డీ గ్లాసెస్ ట్వీట్ చేసి మరోసారి వార్తల్లో నిలిచాడు.
