భారత వన్డే జట్టులో స్థానం కోసం తిరిగి ప్రయత్నిస్తున్నానని అంటున్నాడు టీమ్ఇండియా పేసర్ ఇషాంత్ శర్మ. దీనితోపాటే వన్డే ప్రపంచకప్లోనూ భాగం కావాలని కోరుకుంటున్నట్లు వెల్లడించాడు.
"అందరిలాగే నేనూ ప్రపంచకప్లో ఆడేందుకు ఇష్టపడతాను. విజేతగా నిలిచిన జట్టులోనూ భాగం కావాలని కోరుకుంటున్నా. మిగిలిన ట్రోఫీలతో పోలిస్తే ఇది పూర్తిగా ప్రత్యేక అనుభూతి. ప్రస్తుతం మేం ప్రపంచ టెస్టు ఛాంపియన్షిప్ ఆడుతున్నాం. ఇదీ ప్రపంచకప్ అయినా.. చాలా మంది దీన్ని వన్డే ప్రపంచకప్లా భావించరు"
-ఇషాంత్ శర్మ, టీమ్ఇండియా పేసర్
ఇషాంత్.. అంతర్జాతీయ కెరీర్లో భారత్ తరఫున 80 వన్డేల్లో 115 వికెట్లు, 97 టెస్టుల్లో 297 వికెట్లు తీశాడు. సెప్టెంబరు 19 నుంచి ప్రారంభమయ్యే ఐపీఎల్లో దిల్లీ క్యాపిటల్స్కు ప్రాతినిధ్యం వహించనున్నాడు.
మాజీ కెప్టెన్ ధోనీ తనకు ఎప్పుడూ మద్దతుగా నిలిచేవాడని చెప్పాడు ఇషాంత్. "97 టెస్టులాడిన తర్వాత కూడా నా సగటు, స్ట్రైక్రేటు నాకే అర్థం కాలేదు. అలాంటి విషయాలు నన్ను ఎప్పుడూ బాధించలేదు. అవి కేవలం సంఖ్యలు మాత్రమే. కానీ, కెప్టెన్తో బౌలర్కు ఉండే కమ్యూనికేషన్ చాలా ముఖ్యం. నేను ధోనీతో అలానే ఉంటున్నా. అందుకే అతడి నుంచి నాకు మద్దతు లభించింది" అని అన్నాడు.
