కోలీవుడ్ నటుడు విజయ్ సేతుపతి త్వరలో ఓ బయోపిక్లో నటించనున్నాడు. శ్రీలంక దిగ్గజ బౌలర్ ముత్తయ్య మురళీధరన్ జీవిత కథ ఆధారంగా ఇది తెరకెక్కనుంది. ఎంఎస్‌ శ్రీపతి దర్శకుడు. డార్‌ మోషన్‌ పిక్చర్స్‌ ఈ చిత్రాన్ని నిర్మిస్తోంది. ఈ సినిమాకు '800' అనే టైటిల్‌ను ఫిక్స్ చేసే యోచనలో ఉంది చిత్రబృందం. ఈ సినిమా గురించి నటుడు విజయ్, ఆటగాడు ముత్తయ్య మాట్లాడారు.
"నా జీవిత కథ తెరపైకి వస్తుందనే విషయం వింటేనే చాలా ఆనందంగా ఉంది. 2020లో సినిమా విడుదల చేయడానికి సన్నాహాలు చేస్తున్నారు. విజయ్‌సేతుపతి వంటి అంకితభావమున్న నటుడు నా పాత్ర పోషించడం మరింత గౌరవంగా ఉంది".
--ముత్తయ్య మురళీధరన్, లంక మాజీ క్రికెటర్
"మురళీధరన్ పాత్రలో నటించడం కెరీర్‌లోనే ఓ గొప్ప విషయం. చాలా గౌరవంగా భావిస్తున్నా. వాస్తవానికి ఆయన పాత్ర పోషించడం సవాలుతో కూడుకున్న విషయం" -విజయ్ సేతుపతి, హీరో
విజయ్ సేతుపతి ప్రస్తుతం చిరంజీవి హీరోగా నటిస్తున్న 'సైరా'లో ఓ కీలక పాత్ర పోషిస్తున్నాడు. ఇవే కాకుండా తమిళంలో 'సింధ్బాద్' అనే చిత్రంలో హీరోగా నటిస్తున్నాడు.
ఇది చదవండి: సమీక్ష: భావోద్వేగాల 'డియర్ కామ్రేడ్'
