ఇండియన్ ప్రీమియర్ లీగ్పై పొగడ్తలు కురిపించాడు దిగ్గజ క్రికెటర్ సచిన్ తెందుల్కర్. ఐపీఎల్ వల్లే టీమ్ఇండియా బెంచ్ బలం పెరిగిందని కీర్తించాడు. ఆటగాళ్ల పురోగతికి ఈ లీగ్ ఎంతోగానో తోడ్పడిందని లిటిల్ మాస్టర్ పేర్కొన్నాడు. ప్రతి ఏడాది ప్రపంచ స్థాయి ఆటగాళ్లతో కలిసి ఆడే అవకాశం ఈ టోర్నీతో ఏర్పడిందని తెలిపాడు.
"మేము క్రికెట్ ఆడే తొలినాళ్లలో మాకు ఈ అవకాశం లేదు. వసీమ్ అక్రమ్, షేన్ వార్న్, మెక్ డెర్మాట్, మెర్వ్ హ్యూగ్స్ వంటి బౌలర్లను ఎదుర్కోవాలంటే ఇబ్బంది పడేవాళ్లం. కానీ, ఐపీఎల్ వల్ల ప్రస్తుతం ఈ ఇబ్బంది లేకుండా పోయింది. ఈ పొట్టి లీగ్లోనే మేటి క్రికెటర్ల బౌలింగ్లో ఆడే అవకాశం ఉంది. తాజాగా సూర్య, ఇషాన్ గొప్పగా ఆడటానికి కారణమిదే."
-సచిన్ తెందుల్కర్, భారత మాజీ క్రికెటర్.
ఇంగ్లాండ్తో జరుగుతున్న టీ20 సిరీస్లో సూర్యకుమార్ యాదవ్, ఇషాన్ కిషన్.. అరంగేట్రం మ్యాచ్ల్లోనే అదరగొట్టారు. వారు ఇంతకుముందే ఆర్చర్, స్టోక్స్ వంటి బౌలర్లను ఐపీఎల్లో ఎదుర్కొన్నారు. ఈ ఇద్దరు ఇంగ్లిష్ ఆటగాళ్లు రాజస్థాన్ రాయల్స్కు ప్రాతినిధ్యం వహిస్తున్నారు. దీంతో ప్రస్తుతం వీరి బౌలింగ్ ఆడటానికి సూర్యతో పాటు ఇషాన్ ఎటువంటి సంకోచం చూపలేదు.
డ్రెస్సింగ్ రూమ్ గొప్పతనం అదే..
రోడ్ సేఫ్టీ సిరీస్పై స్పందించిన సచిన్.. తిరిగి డ్రెస్సింగ్ రూమ్ను సహచరులతో పంచుకోవడం ప్రత్యేకంగా ఉందని తెలిపాడు. "ఆట అనేది ప్రతి ఒక్కరినీ గుర్తిస్తుంది. ఇక్కడ కులం, మతం, బ్యాంక్ బ్యాలెన్స్, ఇంకా వేరేది చూడరు. ఎలా ఆడుతున్నామన్నది మాత్రమే ముఖ్యం. ఎవరు ఎక్కడి నుంచి వచ్చినా.. డ్రెస్సింగ్ రూమ్లో మాత్రం జట్టుగా కలిసి ఉంటాం. దేశానికి ప్రాతినిధ్యం వహిస్తున్నామన్న భావన గర్వంగా అనిపిస్తుంది" అని మాస్టర్ బ్లాస్టర్ పేర్కొన్నాడు.
హెల్మెట్ తప్పక ధరించండి..
"ప్రపంచవ్యాప్తంగా ప్రతి ఏడాది దాదాపు 13 లక్షల పైచిలుకు ప్రజలు రోడ్డు ప్రమాదాల కారణంగా చనిపోతున్నారు. భారత్లో లక్షా 50వేలు ప్రాణాలు విడుస్తున్నారు. ఇవీ కూడా హెల్మెట్లు ధరించకపోవడం వల్ల జరుగుతున్నవి. కాబట్టి బండి నడిపే వ్యక్తితో పాటు వెనుక కూర్చున్న వాళ్లు కూడా హెల్మెట్ ధరించాలి" అని సచిన్ సూచించాడు.
ఇదీ చదవండి: ఒలింపిక్స్కు మరో నలుగురు భారత అథ్లెట్లు
