ఆస్ట్రేలియా వేదికగా ఈ ఏడాది పురుషుల టీ20 ప్రపంచకప్ జరగనుంది. అక్టోబరు 18 నుంచి నవంబరు 15 మధ్య జరపాలని నిర్ణయించారు. అయితే ప్రస్తుతం కరోనా వ్యాప్తి తీవ్రమవుతున్న నేపథ్యంలో పలు లీగ్లు, ఒలింపిక్స్ వంటివి వాయిదా పడ్డాయి. ఈ క్రమంలోనే ప్రపంచకప్ జరుగుతుందా? లేదా? అనే సందేహాలు మొదలయ్యాయి. ఈ విషయంపై స్పందించిన అంతర్జాతీయ క్రికెట్ మండలి(ఐసీసీ)... అనుకున్న తేదీ ప్రకారమే ఈ టోర్నీని నిర్వహిస్తామని చెప్పింది.
"టీ20 ప్రపంచకప్ ప్రాంతీయ నిర్వహణ కమిటీ, ప్రస్తుతం పరిస్థితుల్ని పర్యవేక్షిస్తోంది. ఈ టోర్నీ చెప్పిన తేదీ నుంచే ప్రారంభమవుతుంది. ఏడు వేదికల్లో మ్యాచ్లు నిర్వహించనున్నాం" -ఐసీసీ ప్రకటన
ఆస్ట్రేలియాలో ప్రస్తుతం 5788 మంది కరోనా బారిన పడ్డారు. 39 మంది ప్రాణాలు విడిచారు. అక్కడి ప్రభుత్వం ఈ వైరస్ కట్టడిపై చర్యలు తీసుకుంటోంది.
