మరికొద్ది గంటల్లో టీమ్ఇండియాతో జరగబోతున్న రెండో టీ20 ముంగిట ఆస్ట్రేలియా జట్టుకు మరో ఎదురుదెబ్బ తగిలింది. ఆ జట్టు పేసర్ మిచెల్ స్టార్క్ ఈ మ్యాచ్ సహా మూడో టీ20కి దూరమయ్యాడు. అతడి కుటుంబంలో ఒకరు తీవ్ర అనారోగ్యానికి గురి కావడం వల్ల అత్యవసరంగా స్టార్క్ ఇంటికి వెళ్లాల్సి వచ్చింది. ఈ విషయాన్ని ఆసీస్ హెడ్ కోచ్ జస్టిన్ లాంగర్ తెలిపాడు. స్టార్క్ జట్టులో మళ్లీ ఎప్పుడు చేరతాడనేది చెప్పలేమని వెల్లడించాడు.
అంతకుముందు వెన్నెముక, పక్కటెముక గాయంతో మూడో వన్డేకు దూరమయ్యాడు స్టార్క్. ఆ తర్వాత కోలుకుని తొలి టీ20కి హాజరయ్యాడు. కాగా, ఇప్పటికే గాయం కారణంగా స్టార్ బ్యాట్స్మన్ వార్నర్ కూడా జట్టుకు అందుబాటులో ఉండట్లేదు.
తొలి టీ20లో విజయం సాధించిన టీమ్ఇండియా.. ఈ పోరులోనూ గెలిచి సిరీస్ తమ సొంతం చేసుకోవాలని ఆశిస్తోంది. అలాగే ఆసీస్ కూడా ఓటమి నుంచి పుంజుకుని సిరీస్ను సమం చేయాలన్న పట్టుదలతో ఉంది.
ఇదీ చూడండి : భారత్తో మిగతా మ్యాచ్లకు వార్నర్ దూరం
