తాను ఆడిన వారిలో సౌరభ్ గంగూలీ అత్యుత్తమ కెప్టెన్ అని ప్రశంసించాడు మాజీ క్రికెటర్ వసీమ్ జాఫర్. 2000వ సంవత్సరం తర్వాత టీమ్ఇండియాలో మార్పులు చేసి విజయవంతమైన జట్టుగా నిలిపిన ఘనత అతడికే దక్కుతుందని అన్నాడు.
"2000 తర్వాత టీమ్ఇండియాలో సమూల మార్పులు చేసిన ఘనత గంగూలీదే. తన స్వభావం, సహచర ఆటగాళ్లకు అండగా నిలవడం సహా జట్టులో సభ్యులకు అన్ని విషయాల్లో నమ్మకం ఏర్పరిచాడు. సెహ్వాగ్ను ఓపెనర్గా పంపడం సహా జహీర్ఖాన్, యువరాజ్ సింగ్, హర్భజన్ సింగ్ లాంటి వారిని చాలా అవకాశాలిచ్చాడు" -వసీమ్ జాఫర్, భారత మాజీ క్రికెటర్
కెరీర్లో 31 టెస్టులు, 2 వన్డేలు ఆడిన జాఫర్.. సచిన్ సారథిగా ఉన్న సమయంలో అరంగేట్రం చేశాడు. ఆ తర్వాత ద్రవిడ్ కెప్టెన్సీలో 15కుపైగా టెస్టులు ఆడాడు. అయితే గంగూలీ సారథ్యంలో ఆడిన 5 టెస్టుల్లోనూ విఫలమై, కేవలం 149 పరుగులు మాత్రమే చేశాడు. ధోనీ కెప్టెన్గా ఉన్న సమయంలో తన చివరి అంతర్జాతీయ మ్యాచ్లో పాల్గొన్నాడు వసీమ్.
అయితే గంగూలీ కెప్టెన్గా వచ్చే సమయానికి జట్టులో ఫిక్సింగ్ ఆరోపణలు, విదేశాల్లో సరిగా ఆడలేదనే అపవాదులు ఉన్నాయి. తాను బాధ్యతలు చేపట్టిన తర్వాత టీమ్ఇండియా మార్పులు చేసిన దాదా.. ఆటగాళ్లలో స్ఫూర్తి కలిగించాడు. విదేశాల్లోనూ మ్యాచ్లు గెలిచేలా చేశాడు. భారత్ తరఫున విజయవంతమైన సారథుల్లో ఒకడిగా గుర్తింపు తెచ్చుకున్నాడు. ప్రస్తుతం కోహ్లీసేన.. అగ్రశ్రేణి జట్టుగా చలామణి అవుతుందంటే అందులో గంగూలీ కృషి కూడా ఎంతో ఉంది.
ఇవీ చదవండి:
