ఇటీవల భారత్-ఇంగ్లాండ్ మధ్య జరిగిన డేనైట్ టెస్టు కేవలం రెండు రోజుల్లోనే ముగిసింది. కొందరు పిచ్ బాగా లేదంటూ విమర్శలు చేయగా, మరికొందరు బ్యాట్స్మెన్ టెక్నిక్ సరిగా లేదంటూ మాట్లాడారు. ఏది ఎలా ఉన్నప్పటికీ ఎంతో ఆసక్తిరేపిన పింక్ బాల్ టెస్టు కేవలం రెండు రోజుల్లోనే ముగియడం అభిమానులను కాస్త నిరాశకు గురిచేసింది. 1935 తర్వాత ఇంత తక్కువ బంతుల్లో (842) మ్యాచ్ ముగియడం ఇదే మొదటిసారి కాగా మొత్తంగా ఈ లిస్టులో ఏడొవది. ఈ నేపథ్యంలో టెస్టు చరిత్రలో తక్కువ బంతుల్లో ముగిసిన టాప్-3 టెస్టు మ్యాచ్ల వివరాలు చూద్దాం.
ఆస్ట్రేలియా-దక్షిణాఫ్రికా (1932)
1932లో ఆస్ట్రేలియా-దక్షిణాఫ్రికా మధ్య జరిగిన ఐదో టెస్టు తొందరగా ముగిసిపోయిన మ్యాచ్గా నిలిచిపోయింది. మొదట బ్యాటింగ్ చేసిన సౌతాఫ్రికా తొలి ఇన్నింగ్స్లో 36 పరుగులకే ఆలౌటైంది. తర్వాత బ్యాటింగ్కు దిగిన ఆసీస్ 155 పరుగులు చేసి 119 పరుగుల ఆధిక్యాన్ని సంపాదించింది. అనంతరం రెండో ఇన్నింగ్స్లో బ్యాటింగ్కు దిగిన సఫారీ జట్టు మరోసారి విఫలమై 45 పరుగులకే ఆలౌటైంది. దీంతో ఇన్నింగ్స్ 72 పరుగుల తేడాతో ఆసీస్ మ్యాచ్ గెలిచింది. ఈ టెస్టు మొత్తంగా 656 బంతుల్లో ముగిసింది. టెస్టు చరిత్రలో అత్యంత తక్కువ బంతుల్లో ముగిసిన మ్యాచ్ ఇదే.
ఇంగ్లాండ్-వెస్టిండీస్ (1935)
ఈ మ్యాచ్లో టాస్ ఓడి మొదట బ్యాటింగ్కు దిగిన వెస్టిండీస్ తొలి ఇన్నింగ్స్లో 102 పరుగులకు ఆలౌటైంది. విండీస్ ఇన్నింగ్స్లో ఇద్దరు బ్యాట్స్మెన్ మాత్రమే రెండంకెల స్కోర్ నమోదు చేశారు. తర్వాత ఇంగ్లాండ్ మొదటి ఇన్నింగ్స్లో ఏడు వికెట్ల నష్టానికి 81 పరుగులు చేసి తెలివిగా డిక్లేర్ ఇచ్చింది. అనంతరం విండీస్ ఆరు వికెట్ల నష్టానికి 51 పరుగులు చేసి డిక్లేర్ చేసింది. ఇంగ్లాండ్ ముందు 73 పరుగుల లక్ష్యాన్ని ఉంచింది. ప్రారంభంలో రెండు వికెట్లు కోల్పోయిన ఇంగ్లాండ్ ఆ తర్వాత కోలుకుంది. వాలీ హమ్మండ్ 29 పరుగులతో జట్టుకు విజయాన్నందించాడు. ఈ మ్యాచ్ 672 బంతుల్లో ముగిసింది. టెస్టు చరిత్రలో అత్యంత తక్కువ బంతుల్లో ముగిసిన రెండో మ్యాచ్ ఇది.
ఇంగ్లాండ్-ఆస్ట్రేలియా (1888)
టెస్టు చరిత్రలో యాషెస్కు గొప్ప పేరుంది. రెండు అత్యుత్తమ జట్లు పాల్గొనే ఈ సిరీస్ కోసం అభిమానులు ఎంతో ఆత్రుతగా ఎదురుచూస్తుంటారు. యాషెస్లో భాగంగా 1888లో జరిగిన ఓ టెస్టు ఇలా తక్కువ బంతుల్లోనే ముగిసిపోయింది. ఈ మ్యాచ్లో మొదట టాస్ గెలిచి బ్యాటింగ్ చేసిన ఇంగ్లాండ్ 172 పరుగులకు ఆలౌటైంది. తొలి ఇన్నింగ్స్ ప్రారంభంలో మెరుగ్గా బ్యాటింగ్ చేసిన ఆసీస్.. తర్వాత వరుసగా వికెట్లు కోల్పోయి 81 పరుగులకే కుప్పకూలింది. తర్వాత ఆసీస్ను ఫాలోఆన్ ఆడించిన ఇంగ్లీష్ జట్టు.. రెండో ఇన్నింగ్స్లో 71 పరుగులకే ఆలౌట్ చేసింది. ఫలితంగా ఇన్నింగ్స్ 21 పరుగులతో గెలిచింది ఇంగ్లాండ్. ఈ మ్యాచ్ 788 బంతుల్లో ముగిసింది.
