టీ20 ఫార్మాట్లో ఎక్కువగా బ్యాట్స్మన్ ఆధిపత్యం చెలాయిస్తాడు. ఇది అందరికీ తెలిసిన విషయమే. ఒకే ఓవర్లో 20 పరుగులకు పైగా సాధించి.. బౌలర్ను ముప్పుతిప్పలు పెట్టిన సందర్భాలు చాలానే ఉన్నాయి. ఎక్కడో అడపా దడపా మాత్రమే బౌలర్లు రాణించారు. అయితే బంతి, బ్యాట్ మధ్య సమతూకం రావాలంటే.. టీ20 ఫార్మాట్లో కొన్ని మార్పులు తీసుకురావాల్సిన అవసరం ఉందని ఆస్ట్రేలియా దిగ్గజ స్పిన్నర్ షేన్ వార్న్ పేర్కొన్నాడు.
ఈ ఫార్మాట్లో బౌలర్ గరిష్ఠంగా నాలుగు ఓవర్లు వేసే నిబంధన తొలగించి ఐదు ఓవర్ల పద్దతిని ప్రవేశపెట్టాలని తెలిపాడు వార్న్. ఇంగ్లాండ్‌-ఆస్ట్రేలియా జట్ల మధ్య జరిగిన రెండో టీ20కి కామెంటరీ చేస్తున్న క్రమంలో తన అభిప్రాయాలు వెల్లడించాడు.
"టీ20 ఫార్మాట్లో ఒక్కో బౌలర్ ఐదు ఓవర్లు వేస్తే.. బ్యాటింగ్, బౌలింగ్ మధ్య పోరు సమంగా ఉంటుంది. ఈ ఫార్మాట్లో బౌలర్లను కుదించాలి. ఐదుగురు బౌలర్లతో 20 ఓవర్లు జరిపే స్థానంలో.. నలుగురు బౌలర్లతో ఐదేసి ఓవర్లు వేయిస్తే బాగుంటుంది. ఈ మార్పును నేను టీ20ల్లో చూడాలనుకుంటున్నా."
-షేన్ వార్న్, ఆసీస్ బౌలర్
జట్టులో ఎనిమిది మంది బౌలర్లు ఉన్నప్పటికీ.. ఓవర్ల కోటాను పెంచడం వల్ల మ్యాచ్ రసవత్తరంగా మారుతుందని వార్న్ అభిప్రాయపడ్డాడు. "మధ్య ఓవర్లలో స్పిన్నర్లు ఐదు ఓవర్లు వేయగలరని.. దాని వల్ల బ్యాట్స్మన్, స్పిన్నర్ మధ్య మంచి పోరు నెలకొంటుందని పేర్కొన్నాడు.
