బయోపిక్ల ట్రెండ్ను బాగా ఫాలో అవుతున్నారు దర్శకనిర్మాతలు. ఇప్పటికే సినీ, రాజకీయ, క్రీడా, విద్య రంగాల్లోని ప్రముఖుల జీవితగాథలను వెండితెరకు ఎక్కించారు. త్వరలో భారత క్రికెట్లో దిగ్గజ క్రీడాకారిణి మిథాలీరాజ్... బయోపిక్ కూడా తెరకెక్కనుంది. దీనిపై నేడు అధికారిక ప్రకటన ఇచ్చింది చిత్రబృందం. 'శభాష్ మిథు' టైటిల్ ఖరారు చేసినట్లు వెల్లడించింది.
శభాష్ మిథుగా తాప్సీ...
నేడు మిథాలీ 37వ జన్మదినోత్సవం సందర్భంగా చిత్ర విశేషాలను వెల్లడించింది నటి తాప్సీ. సినిమాలో మిథాలీ పాత్రలో తాను కనిపించనున్నట్లు ఆమె స్వయంగా చెప్పింది. ఈ స్టార్ ప్లేయర్ను కలిసి పుట్టినరోజు శుభాకాంక్షలు తెలిపిందీ అందాల నటి.
" హ్యాపీ బర్త్‌డే కెప్టెన్ మిథాలీ రాజ్. క్రికెట్లో ఎన్నో రికార్డులతో మమ్మల్ని గర్వపడేలా చేశావు. నీ జీవిత ప్రయాణాన్ని తెరపై చూపించే అవకాశం నాకు లభించినందుకు గౌరవంగా భావిస్తున్నా. నీ పుట్టినరోజు సందర్భంగా ఏ బహుమానం ఇవ్వాలో తెలియడం లేదు కానీ ఒక మాట చెప్పాలనుకుంటున్నాను. ఈ బయోపిక్‌లో నా రూపంలో నిన్ను నువ్వు చూసుకొని తప్పకుండా గర్వపడతావు. ఇక నేను కవర్ డ్రైవర్ నేర్చుకోవడానికి సిద్ధంగా ఉన్నాను"
-- తాప్సీ, సినీ నటి.
వయాకామ్ 18 సంస్థ నిర్మిస్తోన్న ఈ సినిమాకు.. రాయిస్ ఫేమ్ రాహుల్ ధొలాకియా దర్శకత్వం వహిస్తున్నాడు.
ముచ్చటగా మూడోది...
వైవిధ్యమైత కథాంశాలతో మంచి పేరు తెచ్చుకున్న తాప్సీ... వరుసగా మూడో బయోపిక్‌లో నటిస్తోంది. ఆమె నటించిన 'సాండ్ కీ ఆంఖ్' సినిమా దీపావళికి విడుదలై మంచి విజయం అందుకుంది. ఉత్తర్‌ప్రదేశ్‌కు చెందిన షూటర్స్ ప్రకాశీ తోమర్, చంద్రో తోమర్‌ల జీవితం ఆధారంగా తెరకెక్కిన సినిమా ఇది. ప్రకాశీ పాత్రలో తాప్సీ నటించగా, చంద్రో పాత్రలో భూమి పడ్నేకర్ కనిపించింది.
ప్రస్తుతం తాప్సీ... 'రాకెట్ రష్మి' అనే మరో బయోపిక్‌లోనూ నటిస్తోంది. గుజరాత్‌కి చెందిన రష్మి అనే అథ్లెట్ జీవిత కథ ఆధారంగా ఈ సినిమా తెరకెక్కనుంది. హిందీలో 'నామ్ షబానా', 'బద్లా', 'మిషన్ మంగళ్' వంటి చిత్రాలతో తనదైన గుర్తింపు తెచ్చుకుందీ దిల్లీ భామ.
