టీమ్ఇండియా దిగ్గజ క్రికెటర్ సచిన్ తెందుల్కర్ 2004 ఆస్ట్రేలియా పర్యటనలో జరిగిన ఓ ఆసక్తికర విషయాన్ని అభిమానులతో పంచుకున్నాడు. ఈ టూర్లో నాలుగో టెస్టు మ్యాచ్లో 241 పరుగులు చేసి ఆ సిరీస్ను ప్రత్యేకంగా మార్చాడు లిటిల్ మాస్టర్. తాజాగా, ఈ సందర్భాన్ని గుర్తుచేసుకున్న సచిన్.. 5 రోజులు జరిగిన టెస్టు మ్యాచ్లో బ్రియాన్ ఆడమ్స్ పాడిన 'సమ్మర్ ఆఫ్ 69' పాటను తరచూ వినేవాడినని తెలిపాడు.
" 2004 ఆసీస్ పర్యటనలో సిడ్నీ వేదికగా జరిగిన నాలుగో టెస్టు మ్యాచ్లో 241 పరుగులతో నాటౌట్గా నిలిచా. ఆ మ్యాచ్ జరిగిన ఐదు రోజులూ బ్రియాన్ ఆడమ్ పాడిన 'సమ్మర్ ఆఫ్ 69' పాట విపరీతంగా విన్నా. లంచ్ టైం, టీ టైమ్ అని తేడా లేకుండా అన్ని వేళలా ఆ పాటే విన్నా. ఆ ఐదు రోజులు సమ్మర్ ఆఫ్ 69 తప్ప ఇంకేమి ఉండదనిపిస్తుంది"
-సచిన్ తెందుల్కర్, భారత మాజీ బ్యాట్స్మన్.
ఈ నాలుగో టెస్టు మ్యాచ్లో విధ్వంసకర బ్యాటింగ్ చేసిన సచిన్.. ముందు మూడు మ్యాచ్ల్లో ఘోరంగా విఫలమయ్యాడు. 5 ఇన్నింగ్స్లు ఆడి రెండు సార్లు డకౌట్ అయ్యాడు. మొత్తంగా కేవలం 88 పరుగులే చేశాడు. తర్వాత మళ్లీ ఫామ్లోకి వచ్చిన తెందుల్కర్ 241 పరుగులు చేసిన సిరీస్ను సమం చేయడంలో కీలకపాత్ర పోషించాడు.
2003లో ఆ పాట..
2003 ప్రపంచకప్ సందర్భాన్ని గుర్తు చేసుకున్న సచిన్.. లక్కీ అలీ 'సర్' ఆల్బమ్ పలుమార్లు విన్నట్లు పేర్కొన్నాడు. ఈ టోర్నీలో సచిన్ 673 పరుగులు చేసి అత్యధిక పరుగులు సాధించిన బ్యాట్స్మన్గా నిలిచాడు.
ఇదీ చదవండి:'విరుష్క' వివాహ బంధానికి మూడేళ్లు.. జంట భావోద్వేగం
