ఇటీవల టెస్టుల్లో 400 వికెట్లు తీసిన రవిచంద్రన్ అశ్విన్పై.. భారత సీనియర్ స్పిన్నర్ హర్భజన్ సింగ్ ప్రశంసలు కురిపించాడు. సుదీర్ఘ ఫార్మాట్లో ఇదొక గొప్ప విజయమని కొనియాడాడు.
"టెస్టుల్లో 400 వికెట్లు తీయడమనేది చాలా పెద్ద గొప్ప విషయం. శారీరకంగా, మానసికంగా ఎంతో దృఢంగా ఉండాల్సిన ఫార్మాట్ ఇది. నాలుగు వందల మందిని ఔట్ చేసి.. జట్టు విజయాలకు దోహదపడ్డాడు. అశ్విన్ను లెజెండ్ అనడంలో ఎటువంటి సందేహం లేదు."
-హర్భజన్ సింగ్, టీమ్ఇండియా సీనియర్ బౌలర్.
"అశ్విన్ 400 వికెట్లు తీయకపోయినా.. ఒకవేళ తీసిన బౌలర్ అతడు కాకపోయినా.. అతన్ని లెజెండ్ అని పిలిచేవారు కాదు. కానీ, యాష్ చాలా మ్యాచ్ల్లో టీమ్ఇండియాను గెలిపించాడు. ఏదేమైనా కెప్టెన్ విరాట్ కోహ్లీ నోటి నుంచి అశ్విన్ను లెజెండ్ అని పిలవడం బాగుంది. నేను కూడా ఈ సారి యాష్ను కలిసినప్పుడు లెజెండ్ అని పిలుస్తాను" అని హర్భజన్ తెలిపాడు.
"అహ్మదాబాద్ వేదికగా జరిగిన పింక్ టెస్టులో అశ్విన్.. బెన్ స్టోక్స్ను 11వ సారి ఔట్ చేశాడు. ఇది కూడా ఒక పెద్ద రికార్డు. ముఖ్యమైన ఆటగాళ్లను ఎక్కువ సార్లు ఔట్ చేయడం అతని నేర్పుకు ప్రతీక. అతడు గతంలో డేవిడ్ వార్నర్ను పది సార్లు పెవిలియన్ చేర్చాడు. స్టీవ్స్మిత్ కూడా అశ్విన్ బౌలింగ్ను ఎదుర్కోవడంలో ఇబ్బందిపడ్డాడు."
-హర్భజన్ సింగ్, టీమ్ఇండియా సీనియర్ బౌలర్.
"వికెట్లు తీయడమే బౌలర్ల ప్రధాన పని. అలాంటిది ప్రత్యర్థి జట్టులోని కీలకమైన ఆటగాళ్లను చాలా సార్లు ఔట్ చేయడం గొప్ప విషయం. ఇంగ్లాండ్ టీమ్లో జో రూట్, బెన్ స్టోక్స్లు ముఖ్యమైన బ్యాట్మెన్లు. వారి ప్రదర్శనతో మ్యాచ్ను తమవైపు లాగేసుకునేంతా సత్తా వారి సొంతం. అటువంటిది ఎక్కువ సార్లు వారిని అశ్విన్ పెవిలియన్ పంపాడు. ముందు ముందు కూడా యాష్ ఈ తరహా వికెట్లు తీయాలని కోరుకుంటున్నా" అని భజ్జీ పేర్కొన్నాడు.
ఇదీ చదవండి: 'కేవలం అతడు మాత్రమే మమ్మల్ని అర్థం చేసుకున్నాడు'
