టీమిండియా మాజీ సారథి రాహుల్ ద్రవిడ్ కొడుకు సమిత్ ద్రవిడ్ మళ్లీ చెలరేగి ఆడాడు. బ్యాటింగ్, బౌలింగ్లో రాణించి వావ్ అనిపించుకున్నాడు. రెండునెలల్లోనే రెండు డబుల్ సెంచరీలు బాదిన సమిత్.. తాజాగా మరో ద్విశతకం చేసే అవకాశాన్ని మిస్సయ్యాడు. 166 రన్స్ చేసి ఔటయ్యాడు.
24 బౌండరీలతో...
బీటీఆర్ షీల్డ్ అండర్-14లో భాగంగా మంగళవారం విద్యాశిల్ప్ అకాడమీ, మాల్యా అదితి ఇంటర్నేషనల్ జట్ల మధ్య మ్యాచ్ జరిగింది. ఈ మ్యాచ్‌లో సమిత్ బ్యాట్‌తో రెచ్చిపోయాడు. 131 బంతుల్లో 24 బౌండరీలతో 166 పరుగులు చేసి ఔటయ్యాడు. మరోవైపు బంతితోనూ సత్తా చాటాడు. నాలుగు వికెట్లు పడగొట్టి.. తమ జట్టు మాల్యా అదితి స్కూల్ సెమీఫైనల్ చేరడంలో కీలక పాత్ర పోషించాడు.
ఈ మ్యాచ్‌లో సమిత్ జట్టు నిర్ణీత 50 ఓవర్లలో ఐదు వికెట్ల నష్టానికి 330 పరుగులు చేసింది. అనంతరం 331 పరుగుల లక్ష్యంతో బ్యాటింగ్ ప్రారంభించిన విద్యాశిల్ప్ అకాడమీ జట్టు 38.5 ఓవర్లలో 182 పరుగులకు ఆలౌట్ అయింది.
రెండు 'ద్విశతకాలు'
ఈ నెల 15న..శ్రీ కుమరన్ చిల్డ్రన్స్ అకాడమీ జట్టుతో జరిగిన మ్యాచ్‌లో డబుల్ సెంచరీ చేశాడు సమిత్. 146 బంతుల్లో 33 బౌండరీలతో ద్విశకతం బాదాడు. గతేడాది డిసెంబర్లో జరిగిన అండర్-14 రాష్ట్ర స్థాయి క్రీడల్లోనూ సమిత్ ద్రవిడ్ రాణించాడు. కోల్‌కతాలో అండర్-14 జోనల్‌ టోర్నీలో వైస్‌ ప్రెసిడింట్స్‌ ఎలెవన్ తరఫున ధార్వాడ్‌ జోన్‌పై 201 పరుగులు చేశాడు. 256 బంతులు ఆడిన అతడు 22 బౌండరీలు బాదాడు. రెండో ఇన్నింగ్స్‌లోనూ 94 పరుగులతో నాటౌట్గా నిలిచాడు. బంతితోనూ రాణించి 3 వికెట్లు తీశాడు.
