ఓ దశలో కెప్టెన్సీ ఆస్వాదించలేకపోయానని, అందుకే 2007లో టీమ్ఇండియా నాయకత్వ పగ్గాలు వదిలేశానని భారత క్రికెట్ దిగ్గజం రాహుల్ ద్రవిడ్ తెలిపాడు. గత ప్రదర్శనల గురించి ఆలోచించకుండా కెరీర్లో ముందుకు సాగానని వెల్లడించాడు. ఓ యూట్యూబ్ ఛానెల్లో అతను మాట్లాడుతూ.. "ఇంగ్లాండ్లో జట్టుకు టెస్టు సిరీస్ విజయాన్ని కట్టబెట్టిన తర్వాత కొద్దికాలంలోనే కెప్టెన్సీని ఎందుకు వదిలేశారని" అడిగిన ప్రశ్నకు.. ఈ విధంగా సమాధానమిచ్చాడు.
"అంతకముందులా నాయకత్వాన్ని ఆస్వాదించలేకపోయా. అప్పటికే చాలా మ్యాచ్లాడా కాబట్టి అలా అనిపించిందేమో! ఆ సమయంలో కెప్టెన్సీని ఆస్వాదించడం ఆపేశా. భారత జట్టుకు సారథిగా ఉండటం నా హక్కులా చూడలేదు. ఒకవేళ ఉండాలి అనుకుంటే కచ్చితంగా వందశాతం శ్రమించేవాణ్ని. కానీ ఒక్కసారి వదిలేయాలి అనుకున్న తర్వాత ఇక కొనసాగాలి అనిపించలేదు. టీమ్ఇండియా కెప్టెన్సీ నాకు శక్తిని ఇస్తుందనో లేదంటే ప్రతిష్ఠ తెచ్చిపెడుతుందనో అనుకోలేదు. ఆ భాద్యతను ఆనందంగా చేపట్టా. కానీ ఓ రెండున్నరేళ్ల తర్వాత ఇక చాలు అనిపించింది"
-ద్రవిడ్, టీమ్ఇండియా మాజీ సారథి.
"ప్రతి ఆటగాడికి కెరీర్లో నిరాశజనక ఫలితాలు ఎదురవుతాయి. తప్పుల నుంచి పాఠాలు నేర్చుకుని ముందుకు వెళ్లాలి. గతం గురించి ఆలోచించని వ్యక్తిత్వం నాకు మేలు చేసింది. ఒక ఇన్నింగ్స్లో విఫలమైతే.. తర్వాతి ఇన్నింగ్స్లో ఎలా రాణించాలోనని మాత్రమే ఆలోచించేవాణ్ని. ఆటలో గెలుపోటములు సహజం. కానీ ఓ క్రికెటర్గా మనం ఎంతలా స్ఫూర్తి నింపుతున్నాం, ఇతరులకు ఎలాంటి ప్రేరణ కలిగిస్తున్నామన్నది ముఖ్యం. అలాంటి బాధ్యత నాపై ఉందని తెలుసుకున్నా" అని ద్రవిడ్ చెప్పాడు.
ఐపీఎల్లో రాజస్థాన్ రాయల్స్కు మార్గనిర్దేశకుడిగా ఉన్నప్పుడు స్పాట్ ఫిక్సింగ్ తెరపైకి రావడం.. తన జీవితంలో అత్యంత కఠినమైన దశల్లో ఒకటని 'ద వాల్' వెల్లడించాడు.
ఇదీ చూడండి : ఈ మ్యాచ్ గెలిస్తే సిరీస్ భారత్దే
