ఈ ఏడాది సెప్టెంబరులో దుబాయ్ వేదికగా ఆసియాకప్ జరుగుతుందని.. భారత్, పాక్ జట్లు అందులో పాల్గొంటాయని బీసీసీఐ అధ్యక్షుడు సౌరభ్ గంగూలీ ఇటీవల అన్నాడు. తాజాగా పాక్ అందుకు అంగీకరించింది. ఈ విషయాన్ని ఆ దేశ క్రికెట్ బోర్డు ఛైర్మన్ ఎహ్సాన్ మణి తెలిపాడు.
"ఆసియా క్రికెట్ కౌన్సిల్లోని సభ్యుల నిర్ణయాన్ని మేము గౌరవిస్తాం. పాకిస్థాన్లో ఆడటానికి భారత్ సుముఖత చూపించనందున.. ఇరుజట్లకు ఆమోదయోగ్యమైన వేదికను ఏర్పాటు చేయడానికి త్వరలో జరిగే కౌన్సిల్ సమావేశంలో నిర్ణయం తీసుకుంటాం. అయితే ఈ టోర్నీని దుబాయ్ లేదా బంగ్లాదేశ్లో నిర్వాహిస్తారా అనే అంశంపై స్పష్టత లేదు."
- ఎహ్సన్ మణి, పాక్ క్రికెట్ బోర్డు అధ్యక్షుడు
పాకిస్థాన్ వేదికగా ఈ సెప్టెంబరులో ఆసియాకప్ జరగాల్సి ఉంది. భద్రతా కారణాల వల్ల కోహ్లీసేన.. ఆ దేశానికి వెళ్లేందుకు నిరాకరించింది. అందువల్ల తటస్థ వేదికలో ఈ టోర్నీని నిర్వహించాలని ఐసీసీ భావించింది. ఈ నెల 3న దుబాయ్లో జరగాల్సిన ఆసియా క్రికెట్ కౌన్సిల్ సమావేశం కరోనా వైరస్ వ్యాప్తి కారణంగా వాయిదా పడింది. మళ్లీ ఈ సమావేశం ఎప్పుడు నిర్వహిస్తారో స్పష్టత రాలేదు.
2012లో భారత్-పాక్ మధ్య చివరగా మ్యాచ్ జరిగింది. ఆ తర్వాత నుంచి ఒక్క పరిమిత ఓవర్ల సిరీస్ కూడా ఈ రెండు జట్ల మధ్య వీలుపడలేదు.
ఇదీ చూడండి.. 'ఆసియాకప్ దుబాయ్లోనా.. ఇంకా నిర్ణయం తీసుకోలేదు'
