పాకిస్థాన్లో అంతర్జాతీయ క్రికెట్ మళ్లీ సందడి చేయనుంది. ఎన్నో ఏళ్లుగా ఇబ్బందుల్లో పడిన ఆటను మళ్లీ పునరుద్ధరించేందుకు ఆ దేశ క్రికెట్ బోర్డు నడుం బిగించింది. ఇందులో భాగంగానే ఐసీసీ సభ్య దేశాలన్నీ తమగడ్డపై అడుగుపెట్టేలా ఆహ్వానాలు పంపిస్తూ, చర్చలు జరుపుతోంది. అయితే ఇవి సత్ఫలితాలిస్తున్నాయి. ఫలితంగానే వచ్చే ఏడాది దక్షిణాఫ్రికా, న్యూజిలాండ్, ఇంగ్లాండ్, వెస్టిండీస్ దేశాలు పాక్లో అడుగుపెట్టేందుకు అంగీకారం తెలిపాయి.
దక్షిణాఫ్రికా
వచ్చే ఏడాది జనవరిలో దక్షిణాఫ్రికా జట్టు పాక్లో అడుగుపెట్టనుంది. ఇరుజట్ల మధ్య రెండు టెస్టుల సిరీస్ జరగనుంది. వీటితో పాటు మూడు టీ20లు కూడా నిర్వహించనున్నారు.
న్యూజిలాండ్
వచ్చే సెప్టెంబర్లో పాక్తో మూడు వన్డేలు, ఐదు టీ20లు ఆడనుంది న్యూజిలాండ్. కరాచీలో రెండు టీ20లు జరగనున్నాయి. 2005లో చివరగా పాకిస్థాన్లో అడుగుపెట్టిన ఈ జట్టు.. దాదాపు 15 ఏళ్ల తర్వాత మళ్లీ ఆ గడ్డపై కాలుమోపనుంది.
వెస్టిండీస్
స్వదేశంలో వెస్టిండీస్తోనూ ఓ సిరీస్ ఆడాలని భావిస్తోంది పాక్. ప్రస్తుతం చర్చలు జరుగుతున్నాయి. వచ్చే డిసెంబర్లో ఈ మ్యాచ్లు నిర్వహించనున్నారు.
ఆస్ట్రేలియాతోనూ..
ప్రస్తుతం ఆస్ట్రేలియాతోనూ చర్చలు జరుపుతున్నట్లు పాక్ బోర్డు పేర్కొంది. 2022లో ఆ జట్టు తమ దేశంలో పర్యటించేందుకు ఆసక్తిగా ఉన్నట్లు పీసీబీ తెలిపింది.
అఫ్గానిస్థాన్తోనూ వచ్చే ఏడాది కొన్ని పరిమిత ఓవర్ల మ్యాచ్లు ఆడించాలని పాకిస్థాన్ యోచనలో ఉంది.
ఇదీ జరిగింది..
2009 మార్చిలో పాక్లో పర్యటించిన శ్రీలంక ఆటగాళ్ల బస్సుపై ఉగ్రదాడి జరిగింది. ఆ ఘటనలో ఆరుగురు పోలీసులు, ఇద్దరు పౌరులు మృతి చెందగా ఆరుగురు లంక క్రికెటర్లకు గాయలయ్యాయి. అప్పటి నుంచి దక్షిణాసియా దేశాలు పాక్లో పర్యటించేందుకు ఆసక్తి కనబర్చలేదు. ఆ తర్వాత నుంచి పాక్ ఆడే ద్వైపాక్షిక సిరీస్లు, అంతర్జాతీయ మ్యాచ్లన్నీ తటస్థ వేదికైన యూఏఈలో జరిగేవి. అయితే 2015లో మళ్లీ పాక్లో తొలిసారి కాలుమోపింది జింబాబ్వే జట్టు. లాహోర్ వేదికగా ఇరుజట్ల మధ్య పరిమిత ఓవర్ల మ్యాచ్లు జరిగాయి. గతేడాది సెప్టెంబర్ 27 నుంచి అక్టోబర్ 9 వరకు పాక్లో పర్యటించింది లంక జట్టు. అనంతరం బంగ్లాదేశ్ కూడా అక్కడ అడుగుపెట్టింది. ఇటీవల కాలంలో పాకిస్థాన్ సూపర్ లీగ్ను దిగ్విజయంగా నిర్వహించింది పాకిస్థాన్. ఈ టోర్నీలో డేల్ స్టెయిన్, షేన్ వాట్సన్, ఏబీ డివిలియర్స్ లాంటి అంతర్జాతీయ క్రికెటర్లు కనువిందు చేశారు.
భద్రతతోనే..
పాకిస్థాన్ సూపర్ లీగ్ అద్భుతంగా నిర్వహించడం, ఆటగాళ్ల భద్రతపై ఎక్కువగా దృష్టి పెట్టడం వంటి కారణాలను పాక్ బోర్డు తమ విజయాలుగా పేర్కొంటోంది. అంతర్జాతీయ క్రికెటర్ల కోసం ఆర్మీ సహకారంతో దేశాధ్యక్షుడి స్థాయి భద్రతను కల్పిస్తున్నట్లు చెప్తోంది.
భారత్తో మాత్రం కష్టమే..
భారత్-పాకిస్థాన్ దాయాది జట్ల మధ్య ద్వైపాక్షిక సిరీస్లు జరిగితే అది ప్రపంచ క్రికెట్కు మంచిదని పాకిస్థాన్ క్రికెట్ బోర్డు భావిస్తోంది. అయితే ఉగ్రవాద నిర్మూలన చేపట్టకపోవడం సహా సరిహద్దుల్లో దాడులకు పాల్పడటం లాంటి చర్యల వల్ల ఇరుదేశాల మధ్య సత్సంబంధాలు మెరుగుపడట్లేదు. ఈ నేపథ్యంలోనే ఇరుదేశాల మధ్య క్రికెట్కు బ్రేక్ పడింది.
చివరగా 2013 జనవరిలో పాక్ జట్టు భారత్‌లో రెండు టీ20లు, మూడు వన్డేలు ఆడింది. అప్పటి నుంచి ఇరు జట్ల మధ్య ఎలాంటి ద్వైపాక్షిక సిరీస్లు జరగలేదు. కేవలం ఐసీసీ, లేదా ఆసియా కప్‌ల సందర్భంగానే తలపడుతున్నాయి. ఇక 2007-2008 సీజన్‌లో ఇరు జట్లూ చివరి సారి టెస్టు సిరీస్ ఆడాయి.
