ఇంగ్లీష్ గడ్డపై పర్యటనకు వెళ్లిన పాకిస్థాన్ క్రికెట్ బృందానికి, కరోనా నెగటివ్గా తేలిందని ఇంగ్లాండ్ క్రికెట్ బోర్డు తెలిపింది. ఇటీవలే తమ దేశానికి చేరుకున్న పాక్ జట్టు సభ్యులకు (20 మంది ఆటగాళ్లు + 11 మంది సహాయక సిబ్బంది) ఈ పరీక్షలు చేసినట్లు తెలిపింది.
మూడుసార్లు పరీక్షలు
తమ క్రికెటర్లకు, సోమవారం చివరిసారి కొవిడ్ పరీక్షలు చేయించామని ఇంగ్లాండ్ క్రికెట్ బోర్డు స్పష్టం చేసింది. ఆటగాళ్లతో పాటు సహాయక సిబ్బందికి ఇప్పటికే మూడుసార్లు కరోనా టెస్ట్లు నిర్వహించామని ఈసీబీ తెలిపింది.
ఆ నలుగురు స్వదేశంలోనే!
కరోనా బారిన పడిన పదిమంది పాకిస్థాన్ ఆటగాళ్లకు తాజాగా చేసిన పరీక్షల్లో ఆరుగురికి నెగటివ్ వచ్చిందని పాక్ క్రికెట్ బోర్డు ప్రకటించింది. కోలుకున్న వారిని తిరిగి ఇంగ్లాండ్ పర్యటనకు పంపిస్తామని తెలిపింది. మిగిలిన నలుగురు ఆటగాళ్లు(ఇమ్రాన్ ఖాన్, కాశీఫ్ బట్టీ, హైదర్ అలీ, హరీస్ రఫ్) స్వదేశంలోనే ఉంటారని స్పష్టం చేసింది.
క్వారంటైన్ ప్రారంభం
ఇంగ్లాండ్, పాకిస్థాన్ల మధ్య ఆగస్టులో మూడు టెస్టులు, మూడు వన్డేలు జరగనున్నాయి. అయితే ఈ మ్యాచ్ల షెడ్యూల్ను ఇంకా విడుదల చేయలేదు. పాకిస్థాన్ క్రికెట్ బృందం, గత ఆదివారం యునైటెడ్ కింగ్డమ్కు చేరిన తర్వాత 14 రోజుల క్వారంటైన్లో ఉంటున్నట్లు పాక్ తెలిపింది.
