భారత్-న్యూజిలాండ్ మధ్య జరుగుతోన్న తొలి టెస్టు మొదటి రోజు ఆట ముగిసింది. వర్షం కారణంగా 55 ఓవర్ల పాటే సాగిన ఈ మ్యాచ్లో న్యూజిలాండ్ బౌలర్లు ఆధిపత్యం వహించారు. ఆట ముగిసే సమయానికి టీమిండియా 5 వికెట్ల నష్టానికి 122 పరుగులు చేసింది.
టాస్ ఓడి మొదట బ్యాటింగ్కు దిగిన టీమిండియాకు ఆదిలోనే ఎదురుదెబ్బ తగిలింది. ఓపెనర్‌ పృథ్వీషా(16), నయా వాల్‌ పుజారా(11), కెప్టెన్‌ విరాట్‌ కోహ్లీ(2), మిడిల్‌ ఆర్డర్‌ బ్యాట్స్‌మన్‌ హనుమ విహారి(7) పూర్తిగా విఫలయమ్యారు. మయాంక్ అగర్వాల్ 34 పరుగులు చేసి బౌల్ట్ బౌలింగ్లో వెనుదిరిగాడు.
అనంతరం టీ విరామ సమయానికి వర్షం అడ్డంకిగా మారింది. ఫలితంగా మ్యాచ్ నిలిచిపోయింది. వర్షం అలాగే కొనసాగిన కారణంగా మొదటి రోజు ఆటను నిలిపివేశారు అంపైర్లు. అప్పటికి టీమిండియా 5 వికెట్ల నష్టానికి 122 పరుగులు చేసింది. క్రీజులో రిషభ్ పంత్ (10), అజింక్య రహానే (38) ఉన్నారు. వీరిద్దరూ న్యూజిలాండ్ బౌలర్లను సమర్థవంతంగా ఎదుర్కొంటూ పరుగులు సాధిస్తున్నారు.
