1999లో జరిగిన ఆడిలైడ్ టెస్టులో సచిన్ను వివాదాస్పద "షోల్డర్ బిఫోర్ వికెట్" ఔట్గా ప్రకటించిన అంపైర్ డారిల్ హార్పర్ నిర్ణయాన్ని తాను సమర్థించలేదని టీమ్ఇండియా మాజీ ఆటగాడు ఎమ్మెస్కే ప్రసాద్ స్పష్టం చేశాడు. సచిన్ విషయంలో తన నిర్ణయం పట్ల ఇప్పటికీ గర్విస్తున్నానని డారిల్ ఇటీవల తెలిపాడు. సచిన్కూ ఇది ఔటని తెలుసని 2018లో అదే మైదానంలో అప్పటి జట్టులోని వికెట్కీపరైన ప్రసాద్ను కలిసినప్పుడు తనకు చెప్పాడని డారిల్ పేర్కొన్నాడు. అయితే ఆ వార్తల్లో నిజం లేదని, సచిన్ ఆ ఔట్ను ఒప్పుకున్నట్లు డారిల్తో తాను అనలేదని ప్రసాద్ చెప్పాడు.
"ఆ తప్పుడు నిర్ణయం పట్ల డారిల్ చాలా కాలం పాటు పశ్చాత్తాపం చెందాడు. 2018 టెస్టు సిరీస్ సందర్భంగా అతను భోజనాల గదిలో నన్ను కలిశాడు. వివాదాస్పదంగా మారిన తన నిర్ణయం పట్ల సచిన్ స్పందన ఏమిటీ అనే నన్ను అడిగాడు. 'నువ్వు ఇచ్చిన నిర్ణయం ఔటైనా లేదా కాకపోయినా కూడా సచిన్ ఎప్పుడూ అంపైర్ నిర్ణయాలను ప్రశ్నించే వ్యక్తి కాదు. అందుకే అతను ఎంతోమందికి స్ఫూర్తిగా నిలిచాడు. భారత క్రికెట్ దేవుడిగా ఎదిగాడు' అని అతనికి చెప్పా. అంతేకానీ డారిల్ అన్నట్లు సచిన్ ఔట్ అని నేనెప్పుడూ చెప్పలేదు. అది అబద్ధం. ఆ నిర్ణయం ఇవ్వగానే అప్పటి డ్రెస్సింగ్ రూమ్లో ఉన్న మేమందరం షాక్కు గురయ్యాం" అని ప్రసాద్ పేర్కొన్నాడు.
