గతేడాది వార్షిక కాంట్రాక్ట్ల జాబితాను టీమిండియా ప్రకటించగానే అందరూ ఆశ్చర్యపోయారు. అందులో ధోనీ పేరు లేదేంటా అని చర్చించుకున్నారు. అతడు రిటైర్మెంట్ తీసుకునేందుకు సిద్ధమయ్యాడని భావించారు. అందుకు తగ్గట్లుగానే వన్డే ప్రపంచకప్ తర్వాత నుంచి మహీ, ఆటకు దూరంగా ఉండటం వల్ల ఈ వ్యాఖ్యలకు బలం చేకూరింది. తాజాగా ఇదే విషయమై మాట్లాడిన బీసీసీఐ మాజీ చీఫ్ సెలక్టర్ ఎమ్మెస్కే ప్రసాద్.. క్రికెట్ నుంచి ధోనీ ఇష్టప్రకారమే తప్పుకున్నాడని, ఇది తనకు ముందే తెలుసని పేర్కొన్నాడు.
"ఈ విషయంపై చాలా స్పష్టంగా ఉన్నాను. అతడితో చర్చలు కూడా జరిపాం. కొంతకాలం పాటు క్రికెట్కు దూరంగా ఉండాలని అనుకుంటున్నట్లు ధోనీ నాతో చెప్పాడు. అందుకే అతడి స్థానంలో యువ వికెట్కీపర్ రిషభ్ పంత్కు అవకాశం కల్పించాం" -ఎమ్మెస్కే ప్రసాద్, సెలక్షన్‌ కమిటీ మాజీ ఛైర్మన్‌
ధోనీ తర్వాత వికెట్కీపర్గా జట్టులోకి వచ్చిన పంత్.. ఆశించినమేర ప్రదర్శన కనబర్చలేకపోయాడు. దీనితో పాటే గాయాలు, అతడిని మరింత ఇబ్బంది పెట్టాయి. తద్వారా కేఎల్ రాహుల్కు కీపర్గా అవకాశం వచ్చింది. ప్రస్తుతం ఆ బాధ్యతలు చక్కగా నిర్వర్తిస్తున్న రాహుల్.. బ్యాటింగ్లోనూ అదరగొడుతున్నాడు. దీంతో సెలక్టర్లు... ధోనీ ఎంపిక విషయంలో పునరాలోచనలో పడ్డారు.
ఇంగ్లాండ్‌లో గతేడాది జరిగిన వన్డే ప్రపంచకప్ సెమీస్లో చివరగా ఆడిన ధోనీ.. ఆ తర్వాత క్రికెట్కు తాత్కాలిక విరామం ప్రకటించాడు. ఈ ఏడాది ఐపీఎల్లో చెలరేగి, జాతీయ జట్టులో తిరిగి చోటు దక్కించుకోవాలని భావించాడు. కానీ కరోనా ప్రభావంతో టోర్నీని నిరవధిక వాయిదా వేశారు.
