ఓటీటీలో టాప్ స్టార్స్​ మూవీ పార్టీ - వెంకీ మామ, కీర్తి 'అక్క' ఇంకా ఎవరెవరు రానున్నారంటే?

ఓటీటీలో అగ్రతారల మెరుపులు- నెట్​ఫ్లిక్స్​లో త్వరలో రిలీజ్ కానున్న మూవీస్, వెబ్ సిరీస్ లు ఏవంటే?

Netflix Movies OTT : ప్రస్తుత టెక్నాలజీ యుగంలో ఎంటర్టైన్ మెంట్​కు కొదువే లేదు. ఈ నేపథ్యంలోనే ప్రతి వారం కొత్త కథలు, భిన్నమైన పాత్రలతో థియేటర్లు, ఓటీటీల వేదికగా ఎన్నో చిత్రాలు ప్రేక్షకుల ముందుకు వస్తుంటాయి. మరోవైపు నటీనటులు సైతం వేదికేదైనా సరే ప్రేక్షకుల్ని అలరించడమే లక్ష్యంగా ముందుకొస్తుంటారు. ఇప్పుడు ఈ బాటలోనే పలువురు తారలు వైవిధ్యమైన చిత్రాలు, వెబ్‌సిరీస్‌లతో ఓటీటీ వేదికగా సందడి చేయడానికి రెడీ అయ్యారు. తాజాగా ప్రముఖ ఓటీటీ సంస్థ నెట్‌ఫ్లిక్స్‌ ఈ ప్రాజెక్టులకు సంబంధించిన వివరాల్ని ప్రకటించింది. ఈ మేరకు ఆ ప్రాజెక్టుల టీజర్​లను రిలీజ్ చేసింది. అవేంటో ఓ సారి చూద్దాం.

రానా నాయుడు-2
"రానాను ఆపగలిగేది అతని తండ్రి మాత్రమే" అంటూ 'రానా నాయుడు' మరోసారి సిద్ధమయ్యారు. యాక్షన్, క్రైమ్‌ నేపథ్యంలో రూపొంది 'రానా నాయుడు' వెబ్‌ సిరీస్‌ సక్సెస్ సాధించింది. టాలీవుడ్ హీరోలు వెంకటేశ్, రానా ప్రధాన పాత్రల్లో నటించిన ఈ సిరీస్​ ఎన్నో విమర్శలు ఎదురైనా సరే ఓటీటీ వేదికగా సత్తా చాటి హిట్ టాక్ తెచ్చుకుంది. ఇప్పుడు దీనికి సీక్వెల్​గా 'రానా నాయుడు-2' రానుంది. ఈ విషయాన్ని అధికారికంగా ప్రకటిస్తూ ఇన్‌స్టా వేదికగా టీజర్‌ను రిలీజ్ చేసింది నెట్‌ఫ్లిక్స్‌. 'ఇప్పుడు విధ్వంసం మొదలవబోతుంది మామ. ఎందుకంటే ఇది రానా నాయుడు స్టైల్‌' అనే క్యాప్షన్​ జోడించింది. కరణ్‌ అన్షుమాన్, సుపర్ణ్‌ వర్మ రూపొందిస్తున్న ఈ సిరీస్‌లో అర్జున్‌ రాంపాల్‌ కీలక పాత్రలో కనిపించనున్నారు.

దొంగగా సైఫ్
ఏ పాత్రలోనైనా సునాయాశంగా ఒదిగిపోయే నటుల్లో బాలీవుడ్ స్టార్ సైఫ్ అలీఖాన్ ఒకరు. ఈ సారి ఆయన ఓ దొంగగా కనిపించనున్నారు. కూకీ గలాటీ, రాబీ గ్రేవాల్‌ తెరకెక్కిస్తున్న 'జ్యువెల్‌ థీఫ్‌'లో ఆయన నటిస్తున్నారు. జైదీప్‌ అహ్లావత్‌ ఈ చిత్రంలో కీలక పాత్రలో కనిపించనున్నారు. తాజాగా ఈ సినిమా టీజర్‌ను సామాజిక మాధ్యమాల వేదికగా చిత్రబృందం రిలీజ్ చేసింది. ఒక అమూల్యమైన వజ్రాన్ని దోపిడి చేయడానికి సైఫ్‌ చేస్తున్న ప్రయత్నాలతో ఆద్యంతం ఆసక్తిగా సాగింది ఈ టీజర్‌.

అక్కగా కీర్తి సురేశ్
ఇటీవలే తన ప్రియుడిని పెళ్లాడిన కీర్తి సురేశ్‌ త్వరలో 'అక్క'గా ప్రేక్షకుల్ని పలకరించేందుకు సిద్ధమవుతున్నారు. కీర్తి, రాధికా ఆప్టే ప్రధాన పాత్రల్లో నటిస్తున్న వెబ్‌సిరీస్​ను ధర్మరాజ్ శెట్టి రూపొందించారు. తాజాగా ఈ సిరీస్‌ను అధికారికంగా ప్రకటిస్తూ టీజర్‌ను విడుదల చేశారు. "ఒక తిరుగుబాటుదారుడు పతనానికి కుట్ర పన్నాడు. పెర్నేరుకు చెందిన ఓ అమ్మాయి అక్కలపై ప్రతీకారం తీర్చుకోవాలని చూస్తుంది. వేచి ఉండండి 'అక్క' త్వరలో వస్తోంది" అని వ్యాఖ్యల్ని జోడించింది. రివేంజ్ డ్రామాగా ఈ సిరీస్‌లో తెరకెక్కినట్లు తెలుస్తోంది. కీర్తి సురేశ్ ఓ పవర్ ఫుల్ పాత్రలో కనువిందు చేయనున్నట్లు టీజర్‌ తో అర్థమవుతోంది.

రాజ్‌కుమార్‌ రావ్ 'టోస్టర్‌'
బాలీవుడ్‌ హీరో రాజ్‌కుమార్‌ రావ్, సన్యా మల్హోత్రా జంటగా నటించిన సినిమా 'టోస్టర్‌'. రొమాంటిక్‌ కామెడీ డ్రామాను వివేక్‌ దాస్‌ చౌదరి ఈ సినిమాను తెరకెక్కిస్తున్నారు. తాజాగా ఈ సినిమాను అధికారికంగా ప్రకటిస్తూ ఇన్‌స్టా వేదికగా టీజర్‌ను పంచుకుంది నెట్‌ఫ్లిక్స్‌. ఇద్దరు భార్యాభర్తల మధ్య జరుగుతున్న వినోదాత్మక సంభాషణలతో మొదలైన ఈ టీజర్‌ ఆద్యంతం ఆసక్తిగా సాగింది. ఈ సినిమాతో రాజ్‌కుమార్‌ నిర్మాతగా తొలి అడుగు వేశారు. మరోవైపు విలక్షణ నటుడు ఆర్‌.మాధవన్, ఫాతిమా సనా షేక్‌ ప్రధాన పాత్రల్లో నటిస్తున్న చిత్రం 'ఆప్‌ జైసా కో', 'దిల్లీ క్రైమ్‌ 3', 'మండలా మర్డర్స్‌' లాంటి విభిన్నమైన ప్రాజెక్టులను నెట్‌ఫ్లిక్స్‌ ప్రకటించింది.

సూపర్ సుబ్బుగా సందీప్ కిషన్
సెన్సిటివ్ టాపిక్ అయిన సెక్స్ ఎడ్యుకేషన్ కథా నేపథ్యంలో సందీప్ కిషన్ 'సూపర్ సుబ్బు' వెబ్ సిరీస్ తెరకెక్కుతోంది. ఇందులో సందీప్ కిషన్, బ్రహ్మనందం ప్రధాన పాత్రలో నటిస్తున్నారు. మిథిలా పాల్కర్ హీరోయిన్‌. మురళీ శర్మ మరో కీలక పాత్రలో నటిస్తున్నారు. ఈ వెబ్ సిరీస్​ను త్వరలోనే ఓటీటీ స్ట్రీమింగ్ చేసేందుకు ఏర్పాట్లు చేస్తున్నట్టు నెట్​ఫ్లిక్స్ ప్రకటించింది. ఈ వెబ్ సిరీస్​ను 'టిల్లు 2' డైరెక్టర్ మల్లిక్ రామ్ తెరకెక్కిస్తున్నారు.