పుణె వేదికగా దక్షిణాఫ్రికాతో జరుగుతోన్న రెండో టెస్టులో టీమిండియా సారథి విరాట్ కోహ్లీ రికార్డుల మోత మోగించాడు. భారత్ తరఫున టెస్టుల్లో అత్యధిక పరుగులు సాధించిన సారథిగా నిలిచాడు. ఫలితంగా టీమిండియా 601 పరుగులు చేసి తొలి ఇన్నింగ్స్ను డిక్లేర్ చేసింది.
ఓవర్నైట్ స్కోర్ 273 పరుగులతో బ్యాటింగ్ ప్రారంభించిన టీమిండియాకు రహానే, కోహ్లీ నాలుగో వికెట్కు మంచి భాగస్వామ్యాన్ని అందించారు. రహానే 59 పరుగులు చేసి ఔటయ్యాక జడేజాతో కలిసి మరో వికెట్ పడకుండా స్కోర్ బోర్డును పరుగులు పెట్టించాడు విరాట్. ఈ క్రమంలో డబుల్ సెంచరీని సాధించాడు. 91 పరుగులు చేసిన జడేజా ముత్తుసామి బౌలింగ్లో ఔట్ కాగా.. కోహ్లీ డిక్లేర్ ప్రకటించాడు. అప్పటికీ విరాట్ 254* పరుగులతో క్రీజులో ఉన్నాడు.
కోహ్లీ అదరహో...
ఈ మ్యాచ్లో 254* పరుగులు చేసిన కోహ్లీ మరో రికార్డు ఖాతాలో వేసుకున్నాడు. భారత్ తరఫున టెస్టుల్లో అత్యధిక పరుగులు సాధించిన సారథిగా తన రికార్డును తానే బద్దలు కొట్టుకున్నాడు
భారత కెప్టెన్లు అత్యధిక పరుగులు...
- 254* (కోహ్లీ) vs దక్షిణాఫ్రికా (2019)
- 243 (కోహ్లీ) vs శ్రీలంక (2017)-
- 235 (కోహ్లీ) vs ఇంగ్లాండ్ (2016)
- 224 (ధోనీ)vs ఆస్ట్రేలియా (2012)
