వెస్టిండీస్ ఆల్రౌండర్ ఆండ్రూ రసెల్ ఆట గురించి ప్రత్యేకంగా చెప్పాల్సిన పనిలేదు. ఎందుకంటే అతడు మైదానంలో దిగితే ఆకాశమే హద్దుగా చెలరేగుతాడు. తన విధ్వంసకర బ్యాటింగ్తో ప్రత్యర్థి బౌలర్లకు చుక్కలు చూపిస్తాడు. అయితే అతడితో కలిసి ఐపీఎల్లో బ్యాటింగ్ చేయడం ఎలా ఉంది? అన్న ఓ నెటిజన్ ప్రశ్నకు, భారత యువ క్రికెటర్ శుభ్మన్ గిల్ క్రేజీ సమాధానమిచ్చాడు. దీనితో పాటే #ఆస్క్శుభ్మన్ పేరుతో ట్విట్టర్లో పలువురి సందేహాలను తీర్చాడు.
రసెల్తో కలిసి ఆడుతుంటే మ్యాచ్ హైలెట్స్ చూసిన అనుభూతి కలుగుతుందని, అతడు క్రీజులో ఉంటే, తను దాదాపు నాన్ స్ట్రైకింగ్ ఎండ్కే పరిమితం కావాల్సి వస్తుందని గిల్ చెప్పాడు.
రిటైర్ అయిన ఆటగాళ్లలో ఎవరితో ఆడేందుకు ఇష్టపడతావని శుభ్మన్ను ప్రశ్నించగా, తడుముకోకుండా దిగ్గజ సచిన్ తెందుల్కర్ పేరు చెప్పాడు. విదేశీ క్రికెటర్లతో అయితే ఆసీస్ మాజీ కెప్టెన్ రికీ పాంటింగ్ అంటే తనకెంతో ఇష్టమని పేర్కొన్నాడు. అలానే తమ ఫ్రాంఛైజీ యజమాని షారుక్.. తమకు ఎప్పుడూ మద్దతుగా నిలుస్తారని గిల్ అన్నాడు. 2018 నుంచి ఐపీఎల్లో కోల్కతా నైట్రైడర్స్ తరఫున ఆడుతున్న ఇతడు.. 132 స్ట్రైక్రేట్తో 499 పరుగులు చేశాడు.
