తన కెప్టెన్సీలో దేశానికి తొలి ప్రపంచకప్ అందించిన టీమ్ఇండియా మాజీ సారథి కపిల్ దేవ్... మైదానంలో ఎన్నో అద్భుతాలు చేసి అభిమానుల మనసుల్లో చోటు సంపాదించుకున్నారు. ఇటీవల 'నో ఫిల్టర్ నేహా' కార్యక్రమంలో పాల్గొన్న ఆయన.. అప్పట్లో తన భార్య రోమికి ఎలా ప్రపోజ్ చేశారో వెల్లడించారు.
"నేను నటించిన ఓ యాడ్ హోర్డింగ్ పక్క నుంచి మేమిద్దం కలిసి ఓ సారి కారులో వెళ్తున్నాం. ఆ ప్రకటనలో వెన్న కారుతున్న నా పళ్లు బయటకు కనిపిస్తున్నాయి. అయితే మళ్లీ అదే ఫోజులో నన్ను ఓ ఫొటో తీయమని రోమిని అడిగాను. ఎందుకని ఆమె తిరిగి ప్రశ్నించింది. ఈ ఫొటోను భవిష్యత్తులో మన పిల్లలకు చూపించాలిగా అని పరోక్షంగా ప్రపోజ్ చేశాను. అది ఆమెకు అర్థమైంది. మీరు నన్ను ప్రేమిస్తున్నారా? అని తిరిగి అడగ్గా అవునని చెప్పాను. అలా మేం ప్రేమలో పడ్డాం. ఆ తర్వాత రోమీ వాళ్ల తాతగారిని ఒప్పించడానికి చాలా కష్టపడ్డాను. ఆయన నాపై ప్రశ్నల వర్షం కురిపించారు. కానీ ఆమె తండ్రి మాత్రం త్వరగానే ఒప్పుకున్నారు. అనంతరం 1980లో మా పెళ్లి జరిగింది"
-కపిల్ దేవ్, టీమ్ఇండియా మాజీ క్రికెటర్
కొన్ని రోజుల క్రితం గండెపోటుకు గురైన కపిల్దేవ్.. యాంజియోప్లాస్టీ చికిత్స ద్వారా కోలుకున్నారు. ప్రస్తుతం ఆరోగ్య పరిస్థితి నిలకడగానే ఉందని ఇటీవల ట్విట్టర్ ద్వారా స్వయంగా తెలిపారు.
తొలి బౌలర్గా
టీమ్ఇండియాకు 16 ఏళ్లపాటు ఆల్రౌండర్గా సేవలందించిన కపిల్.. ప్రస్తుతం క్రికెట్ విశ్లేషకుడిగా కొనసాగుతున్నారు. కెరీర్లో 131 టెస్టులు, 225 వన్డేలు ఆడారు. టెస్టుల్లో 5000 పరుగులు చేయడం సహా 400కు పైగా వికెట్లు తీశారు. ఈ ఘనత సాధించిన తొలి బౌలర్గా నిలిచారు. 1983లో భారత్కు వన్డేల్లో తొలి ప్రపంచకప్ను అందించిన కెప్టెన్గా చరిత్రలోకి ఎక్కారు.
కపిల్ బయోపిక్ '83'.. త్వరలో ప్రేక్షకుల ముందుకు రానుంది. ఇందులో రణ్వీర్ సింగ్, దీపికా పదుకొణె ప్రధాన పాత్రలు పోషించారు. కరోనా ప్రభావంతో విడుదల వాయిదా పడుతూ వస్తోంది.
ఇదీ చూడండి : తన ఆరోగ్యం గురించి మాట్లాడిన కపిల్దేవ్
