ఆస్ట్రేలియా- టీమ్ఇండియా మధ్య జరిగే మ్యాచ్ అంటే అభిమానులకు ఓ పండగనే చెప్పాలి. ముఖ్యంగా క్రికెట్ మైదానంలో మాజీ ఆసీస్ పేసర్ బ్రెట్లీ, భారత బ్యాటింగ్ లెజెండ్ సచిన్ తెందూల్కర్ మధ్య పోరు ఎంతో ఆసక్తికరంగా ఉండేది. ఆసీస్ పేస్ దాడిని, ప్రధానంగా లీ వేసిన బంతిని సచిన్ బౌండరీ దాటిస్తుంటే అభిమానుల్లో సంతోషం రెట్టింపు అయ్యేది.
తాజాగా సచిన్ తెందూల్కర్ వంటి దిగ్గజ బ్యాట్స్మన్తో పోటీ పడటాన్ని తను ఎంతగానో ఆస్వాదించినట్లు తెలిపాడు బ్రెట్ లీ. తనలోని ఉత్తమమైన బౌలర్ను సచిన్ బయటకు తీసుకొచ్చినట్లు వెల్లడించాడు. ఇటీవలే ఓ మీడియాకు ఇచ్చిన ఇంటర్వ్యూలో మాట్లాడుతూ తన అనుభవాలను పంచుకున్నాడు లీ.
"నా టెస్టు రికార్డుల కంటే వన్డే రికార్డులు మెరుగ్గా ఉన్నాయి. ఎందుకంటే టెస్టుల కంటే వన్డే క్రికెట్లో నాకు ఎక్కువ అవకాశం లభించింది. నేను మంచి ఫామ్లో ఉన్నప్పుడు 160 కిలోమీటర్ల వేగంతో బౌలింగ్ వేసేవాడిని. 2005, 2006 సంవత్సరాల మధ్య నేను చాలా కోల్పోయా. కానీ వన్డే క్రికెట్కు నా బౌలింగ్ మరింత అనుకూలంగా ఉందని భావిస్తున్నా. సచిన్ తెందూల్కర్కు బౌలింగ్ చేసే అవకాశం నిజంగా నన్ను పులకరింపజేసింది. నేను ఉత్తమ బౌలర్ అని నిరూపించుకోవాలనుకున్నా. ఎందుకంటే, మీరు గొప్ప పోటీ ఇవ్వాలనుకుంటే.. అంతే దృఢంగా ఉండాలి. సచిన్తో ఆడుతున్నప్పుడు నాకు చాలాసార్లు అలాగే అనిపించింది. అతను నాలోని ఉత్తమమైన ఆటగాడిని బయటకు తీసుకొచ్చాడు."
-బ్రెట్లీ, మాజీ ఆస్ట్రేలియా బౌలర్
ఆస్ట్రేలియాతో జరిగిన 30 వన్డేల్లో తెందూల్కర్ను 9 సార్లు అవుట్ చేశాడు బ్రెట్లీ. ఇప్పటివరకు తన కెరీర్లో 700 అంతర్జాతీయ వికెట్లు తీశాడు. ఈ క్రమంలోనే "సచిన్పై నేను మంచి రికార్డునే సాధించా. కానీ, పరుగులు చేయడంలో అతనికి నాపై మంచి రికార్డు ఉందని గుర్తించాలి" అని వివరించాడు లీ.
