ఇండియన్ ప్రీమియర్ లీగ్ (ఐపీఎల్) నుంచి కొంతమంది స్టార్ ఆటగాళ్లు స్వచ్ఛందంగా వైదొలుగుతున్నారు. ఈ టోర్నీ కోసం ప్రత్యేకంగా ఏర్పాటు చేసిన బయోబబుల్పై వారికి నమ్మకం కుదరకపోవడం, కొన్ని వ్యక్తిగత కారణాల వల్ల టోర్నీ నుంచి తప్పుకుంటున్నట్లు ప్రకటిస్తున్నారు. ఐపీఎల్ నుంచి ఇప్పటికే చెన్నై సూపర్కింగ్స్ ఆల్రౌండర్ సురేశ్ రైనా, ముంబయి ఇండియన్స్ బౌలర్ లసిత్ మలింగ తప్పుకోగా.. టోర్నీ నుంచి వైదొలుగుతున్నట్లు సీఎస్కే స్పిన్నర్ హర్భజన్ సింగ్ ప్రకటించాడు. వ్యక్తిగత కారణాల వల్ల ఐపీఎల్లో పాల్గొనలేక పోతున్నానని వెల్లడించాడు.
"బయోబబుల్పై నమ్మకం లేనప్పుడు ఛాన్స్ ఎందుకు తీసుకోవాలి? నాకు ఇద్దరు పిల్లలు, తల్లిదండ్రులు ఉన్నారు. టోర్నీ ప్రారంభం నుంచి నేను స్వదేశానికి వచ్చే వరకు ఎలాంటి తప్పు జరగదని గ్యారెంటీ ఏంటి" అని ఐపీఎల్ బయోబబుల్పై రైనా సంచలన వ్యాఖ్యలు చేశాడు.
ఇంగ్లాండ్లో బయోబబుల్ విజయవంతం
జులై 8 నుంచి వెస్టిండీస్, ఇంగ్లాండ్ మధ్య ద్వైపాక్షిక సిరీస్ ప్రారంభమైంది. ఈ సిరీస్ ప్రారంభానికి ముందు ఇరుజట్ల ఆటగాళ్లు నిర్బంధంలో ఉంటూ తరచుగా కొవిడ్ టెస్టులు చేయించుకుని బయోబబుల్లో అడుగుపెట్టారు. ఇందులో రెండు జట్ల ఆటగాళ్లు ఒకే హోటల్, ఒకే స్టేడియాన్ని ఉపయోగించడం వల్ల వారిలో కరోనా కేసులను కట్టడి చేయగలిగారు.
అదే విధంగా పాకిస్థాన్తో ఇంగ్లాండ్ సిరీస్కు ముందు పాక్ జట్టులోని పది మంది క్రికెటర్లకు కరోనా సోకింది. వారందరిని 14 రోజులు నిర్బంధంలో ఉంచి పకడ్బందిగా ప్రణాళికలను అమలు చేయడం వల్ల ఈ సిరీస్ కూడా విజయవంతమైంది. కానీ, ఐపీఎల్ కోసం ఆటగాళ్లందరూ ఒకే ప్రదేశంలో కాకుండా మూడు నగరాల్లో ఉంటూ ప్రాక్టీసు కోసం రోజూ బస్సుల్లో ప్రయాణిస్తున్నారు. ఇలాంటి పరిస్థితిలో ఆటగాళ్లు కరోనా బారిన పడే అవకాశం ఎక్కువగా ఉందని క్రికెట్ పండితులు అభిప్రాయపడుతున్నారు.
ఎన్బీఏలోనూ ఇదే పరిస్థితి
జులై 30 నుంచి ప్రారంభమైన ప్రీమియర్ లీగ్ కోసం ఐదు వారల ముందు నుంచే సన్నద్ధమైంది నేషనల్ బాస్కెట్బాల్ అసోసియేషన్. ఆటగాళ్లకు తొలిసారి చేసిన పరీక్షల్లో 16 మందికి, రెండోసారి 9 మందికి కరోనా సోకింది. దీంతో అప్రమత్తమైన నిర్వాహకులు ఫ్లోరిడాలోని ఓర్లాండ్ వాల్ట్డిస్నీ వరల్డ్ రిసార్ట్లో ఆటగాళ్లను ఉంచి పకడ్బందీగా ప్రణాళికలు అమలుచేశారు. దీంతో టోర్నీ ప్రారంభం తర్వాత ఆగస్టు 19 వరకు ఐదుసార్లు జరిపిన కొవిడ్ టెస్టుల్లో ఎవరికీ పాజిటివ్గా నిర్ధరణ కాలేదు. కానీ, ఐపీఎల్ కోసం ఎనిమిది జట్లు వేర్వేరు హోటళ్లను ఉపయోగించడం, వేర్వేరు నగరాల్లో ఉంటూ ప్రాక్టీసు కోసం మరో నగరానికి వెళ్లడం వంటివి జరుగుతున్నాయి. అందువల్ల ఈ సమస్య ఐపీఎల్కు శాపంగా మారబోతుందని పలువురు అంటున్నారు.
అజాగ్రత్తే కారణమా?
కరోనా నేపథ్యంలో ఆటగాళ్లంతా ఒకచోట కలిసే ముందు కనీసం వారంపాటు నిర్బంధంలో ఉండాలనే నిబంధనను అన్ని ఫ్రాంఛైజీలు పాటించలేదు. యూఏఈ బయలుదేరే ముందు ఆటగాళ్లందరూ భారత్లోనే స్వీయ నిర్బంధంలో ఉండగా.. సీఎస్కే ఆటగాళ్లు మాత్రం దానికి వ్యతిరేకంగా సమావేశమయ్యారు. రాజస్థాన్, ముంబయి ఆటగాళ్లు పీపీఈ కిట్లతో తగిన జాగ్రత్తలు వహిస్తూ ప్రయాణించారు. కానీ, సీఎస్కే ఆటగాళ్లు మాత్రం భౌతిక దూరం, మాస్క్ ధరించడం వంటి చిన్న చిన్న జాగ్రత్తలను విస్మరించారు.
యూఏఈ బయలుదేరే ముందు సీఏస్కే తమను తాము నిర్బంధించుకోలేక పోయింది. అదే కాక శిక్షణా శిబిరాన్ని నిర్వహించాలని నిర్ణయించుకుంది. దీని వల్లే చెన్నై సూపర్కింగ్స్ శిబిరంలో కరోనా కలకలం సృష్టిందనేది క్రీడా విశ్లేషకుల వాదన.
నియంత్రణ ఉంటుందా?
ఆగస్టు 25న ఉసేన్ బోల్ట్కు కరోనా సోకగా.. జమైకాలోని కింగ్స్టన్లో అతడి పుట్టినరోజు వేడుకకు హాజరైన క్రిస్ గేల్ స్వీయనిర్బంధంలోకి వెళ్తున్నానని ప్రకటించాడు. క్వారంటైన్ పూర్తయ్యాకే యూఏఈకి వచ్చాడు గేల్. కానీ, కొన్ని నివేదికల ప్రకారం గేల్ నిర్బంధం పాటించకుండా ఓ యాడ్ చిత్రీకరణకు వెళ్లాడని దానికి సంబంధించిన చిత్రాన్ని సోషల్ మీడియాలో షేర్ చేసి ఆ తర్వాత తొలగించాడని తెలుస్తోంది. ఇలాంటి వారి వల్ల బయోబబుల్ విజయవంతంగా పూర్తవుతుందా? అనే అనుమానాలూ కలుగుతున్నాయి.
