ఈ ఏడాది ఐపీఎల్ కోసం యూఏఈకి తమ కుటుంబ సభ్యుల ప్రయాణంతో పాటు, మార్గదర్శకాలపై లిఖిత పూర్వక వివరణ కావాలని సంబంధిత ఫ్రాంచైజీలు బీసీసీఐని కోరాయి. మార్చి-మే నెలల్లో ఐపీఎల్ నిర్వహించాల్సి ఉంది. అయితే, కరోనా కారణంగా వాయిదా పడింది. ఇటీవలే యూఏఈ వేదికగా సెప్టెంబరు 19 నుంచి నవంబరు 10 వరకు ఈ లీగ్ను జరపనున్నట్లు బీసీసీఐ స్పష్టం చేసింది.
"కొన్ని ఫ్రాంచైజీలు ప్రయాణం కోసం ఇప్పటికే దుబాయ్లోని కొన్ని హాటల్స్ను ఖరారు చేశాయి. చార్టర్డ్ విమానాలు బుక్ చేస్తున్నారు. ఆగస్టు 20 తర్వాత అందరూ యూఏఈకి ప్రయాణించే అవకాశం ఉంది. తాత్కాలిక ప్రణాళిక, తేదీల గురించి ఆటగాళ్లు, సహాయక సిబ్బందికి ముందుగానే తెలియజేశాం. అయితే, వారి కుటుంబ సభ్యుల ప్రయాణాలపై మాకు స్పష్టత కావాలి."
-ఐపీఎల్ ఫ్రాంచైజీల అధికారులు
ఇటీవలే బయో సెక్యూర్ విధానంతో పాటు, నియమ నిబంధనలపై ఐపీఎల్ పాలకమండలితో ఫ్రాంచైజీలు చర్చించాయి. 53 రోజుల పాటు ఈ బయో బబుల్ వాతావరణంలో తమ కుటుంబ సభ్యులు ఎంత వరకు సురక్షితమనే విషయంపై ఫ్రాంచైజీలు ఆందోళన వ్యక్తం చేస్తున్నాయి. ఒకవేళ కుటుంబ సభ్యుల్లో ఎవరైనా నిబంధనలను అతిక్రమిస్తే.. ఎదుర్కొనే పరిణామాలపై స్పష్టత కావాలని ఫ్రాంచైజీలు బీసీసీఐని కోరాయి.
