ఏప్రిల్ 9న ఐపీఎల్ 14వ సీజన్ మొదలవనుంది. రోహిత్ మెరుపులు, కోహ్లీ అరుపులు, ధోనీ వ్యూహాలతో మైదానాలు సందడిగా మారనున్నాయి. గతేడాది కరోనా కారణంగా యూఏఈలో జరిగిన ఈ టోర్నీ ఈసారి స్వదేశంలోనే జరగనుంది. ప్రేక్షకుల అనుమతిపై త్వరలోనే నిర్ణయం తీసుకోనున్నారు. ఈ సందర్భంగా ఇప్పటివరకు జరిగిన ప్రీమియర్ లీగ్లన్నింటిలో అత్యధిక పరుగులు సాధించిన బ్యాట్స్మెన్పై ఓ లుక్కేద్దాం.
విరాట్ కోహ్లీ (రాయల్ ఛాలెంజర్స్ బెంగళూరు)
రాయల్ ఛాలెంజర్స్ బెంగళూరుకు సారథ్యం వహిస్తోన్న కోహ్లీ.. జట్టుకు కప్పు తీసుకురావడంలో మాత్రం విఫలమవుతున్నాడు. బ్యాట్స్మన్గా అద్భుత ప్రదర్శన కనబరుస్తున్నా ఛాలెంజర్స్ను విజయతీరాలకు చేర్చలేకపోతున్నాడు. ఐపీఎల్లో అత్యధిక పరుగులు సాధించిన ఆటగాళ్ల జాబితాలో మొదటి స్థానంలో ఉన్న కోహ్లీ మిగతా ఆటగాళ్లకు గట్టి పోటీ ఇస్తున్నాడు. ఇప్పటివరకు 192 మ్యాచ్లు ఆడి 184 ఇన్నింగ్స్ల్లో 38.16 సగటుతో 5,878 పరుగులు సాధించాడు విరాట్. ఇందులో ఐదు సెంచరీలు, 39 అర్ధశతకాలు ఉన్నాయి.
సురేశ్ రైనా (చెన్నై సూపర్ కింగ్స్)
ఒకప్పుడు టీమ్ఇండియా మిడిలార్డర్లో ధనాధన్ బ్యాటింగ్తో అదరగొట్టాడు రైనా. తర్వాత ఫామ్ కోల్పోయాడు. చాలాకాలం పాటు తుది జట్టులో స్థానం కోసం ఆశగా ఎదురుచూసిన ఇతడు గతేడాది అంతర్జాతీయ క్రికెట్కు రిటైర్మెంట్ ప్రకటించాడు. ఐపీఎల్లో అయినా అతడి ఆట చూడొచ్చు అనుకున్న అభిమానులకు నిరాశే మిగిల్చాడు. టోర్నీ ప్రారంభానికి ముందే యూఏఈ చేరుకున్నా.. వ్యక్తిగత కారణాల వల్ల స్వదేశానికి తిరిగి వచ్చాడు. దీంతో మిడిలార్డర్లో సమతుల్యం కోల్పోయిన సీఎస్కే టోర్నీలో తీవ్రంగా నిరాశపర్చింది. ప్రతి ఐపీఎల్లోనూ అద్భుత ప్రదర్శన చేసే రైనా మొత్తం ఐపీఎల్లో అత్యధిక పరుగులు సాధించిన ఆటగాళ్లలో రెండో స్థానంలో ఉన్నాడు. 193 మ్యాచ్లు ఆడి 189 ఇన్నింగ్స్ల్లో 33.34 సగటుతో 5,368 పరుగులు చేశాడీ చెన్నై సూపర్ కింగ్స్ ఆటగాడు. ఇందులో 1 శతకం, 38 అర్ధశతకాలు ఉన్నాయి.
