ఆస్ట్రేలియాతో టెస్టు సిరీస్లో ఎలాంటి సవాళ్లయినా సరే ఎదుర్కొనేందుకు సిద్ధంగా ఉన్నామని టీమ్ఇండియా కెప్టెన్ విరాట్ కోహ్లీ అన్నాడు. గురువారం మొదలయ్యే డే/నైట్ టెస్టులో(తొలి మ్యాచ్) ఆచితూచి వ్యవహరించాల్సిన అవసరముందని అభిప్రాయపడ్డాడు. రాత్రివేళలో బ్యాటింగ్ చేయడం కొంచెం కష్టమయ్యే అవకాశముందని చెప్పాడు.
"టెస్టుల్లో ప్రణాళికలతో రాణించగలరని భావించడం లేదు. టెస్టు క్రికెట్లో పరిస్థితులను ఎదుర్కొవడం సహా అందుకు తగ్గట్టు ఉత్తమంగా స్పందించడమే కీలకం. కొన్నిసార్లు దూకుడుగా ఆడాలి. డిఫెండ్ చేయాల్సిన క్రమంలో ఆచితూచి ఆడాల్సిన అవసరం ఎంతైనా ఉంది. సాధారణ టెస్టులతో పోలిస్తే పింక్-బాల్ మ్యాచ్కు అనేక వ్యత్యాసముంది. డే/నైట్ మ్యాచ్ కాబట్టి రాత్రివేళలో బ్యాటింగ్ కొంచెం కష్టం కావొచ్చు. ఇదే సమయంలో బౌలర్లు మరింత క్రమశిక్షణతో బౌలింగ్ చేయాలి. టెస్టులు ఆడేప్పుడు సరైన సమయంలో స్పందించాల్సి ఉంటుంది. దీంతో పాటు పక్కాగా ప్రణాళికలు అమలు చేయాలి. ఆస్ట్రేలియాతో టెస్టు సిరీస్లో ప్రతి బ్యాట్స్మన్ కోసం ఒక్కో ప్రణాళికలతో సంసిద్ధమవుతున్నాం. మైదానంలో వాటిని అమలుచేస్తాం"
- విరాట్ కోహ్లీ, టీమ్ఇండియా కెప్టెన్
పింక్ బాల్ వార్మప్ గేమ్ సెంచరీ చేసి ఆకట్టుకున్నా పంత్కు నిరాశే ఎదురైంది. ఆస్ట్రేలియాతో తొలి టెస్టు కోసం టీమ్ఇండియా బుధవారం జట్టు ప్రకటించింది. ఇందులో పంత్తో పాటు కేఎల్ రాహుల్కూ చోటు దక్కలేదు. ఓపెనర్గా పృథ్వీషాకు అవకాశం దక్కగా.. సాహాకు వికెట్ కీపింగ్ బాధ్యతలు అప్పగించారు.
టీమ్ఇండియా: మయాంక్ అగర్వాల్, పృథ్వీషా, విరాట్ కోహ్లీ(కెప్టెన్), పుజారా, అజింక్య రహానె, హనుమ విహారి, వృద్ధిమాన్ సాహా, రవిచంద్రన్ అశ్విన్, ఉమేశ్ యాదవ్, మహ్మద్ షమి, జస్ప్రీత్ బుమ్రా.
ఇదీ చూడండి:
