బౌలింగ్ లైనప్ బలంగా ఉన్న కారణంగా ఆస్ట్రేలియాతో జరిగే టెస్టు సిరీస్లో భారత్ రాణించగలదని ఆశాభావం వ్యక్తం చేశాడు ఇంగ్లాండ్ మాజీ కెప్టెన్ మైక్ అథర్టన్. బోర్డర్-గావస్కర్ టెస్టు సిరీస్ కోసం నవంబర్లో ఆస్ట్రేలియాకు బయలుదేరనుంది టీమ్ఇండియా.
"వారికున్న ఉత్తమ బౌలింగ్ ఎటాక్తో భారత్ ఆస్ట్రేలియాకు బలమైన పోటీ ఇస్తుందని ఆశిస్తున్నా. ఎందుకంటే బలమైన బౌలింగ్ లైనప్ లేకుండా ఆసీస్తో తలపడటం కష్టం. టీమ్ఇండియాను కొన్నేళ్లుగా గమనిస్తే ఆ జట్టు తయారు చేసే ఫాస్ట్ బౌలర్ల సంఖ్య గణనీయంగా పెరిగింది. 1993లో నేను భారత గడ్డపై ఆడిన సమయంలో ఆ జట్టులో ఎక్కువమంది స్పిన్నర్లే ఉండేవారు. ఫాస్ట్ బౌలర్లు కూడా ఉన్నా.. ఇప్పుడున్నంత లోతైన పేస్ ఎటాక్ లేదు".
- మైక్ అథర్టన్, ఇంగ్లాండ్ మాజీ కెప్టెన్
ప్రస్తుత బ్యాట్స్మెన్లలో రోహిత్ శర్మ అత్యుత్తమ ప్రతిభ కలిగినవాడని కొనియాడాడు అథర్టన్. పరిమిత ఓవర్ల ఫార్మాట్లో ఉత్తమ ప్రదర్శన చేస్తున్న హిట్మ్యాన్.. టెస్టుల్లోనూ విజయవంతమవుతాడని అభిప్రాయపడ్డాడు. రోహిత్ ఆటతీరు సహజంగా ఉంటుందని తెలిపాడు.
"ఇంగ్లాండ్ ఆటగాళ్ల కంటే భారత ఆటగాళ్లు ఎందుకు అంత సహజంగా ఆడగలరని రాహుల్ ద్రవిడ్ను అడిగా. 'భారత ఆటగాళ్లకు ఏడాదంతా ప్రాక్టీస్ చేసే సౌలభ్యం ఉంటుంది. కానీ, ఇంగ్లాండ్లోని వాతావరణం దృష్ట్యా క్రికటర్లు ఆరు మాసాలే ప్రాక్టీస్ చేయగలరు' అని ద్రవిడ్ వివరించాడని" తెలిపాడు అథర్టన్.
