టీమ్ఇండియా బౌలింగ్ దళంపై ప్రశంసల జల్లు కురిపించాడు వ్యాఖ్యాత ఆకాశ్ చోప్రా. త్వరలో ప్రారంభంకానున్న టెస్టు సిరీస్లో భారత బౌలర్లకు ఆస్ట్రేలియా టాప్ ఆర్డర్ బ్యాట్స్మెన్ను కట్టడి చేయగలిగే సత్తా ఉందని అభిప్రాయపడ్డాడు. బుమ్రా, షమీ, మహ్మద్ సిరాజ్, ఉమేశ్ యాదవ్, నవదీప్ సైనీతో బౌలింగ్ విభాగం పటిష్ఠంగా ఉందని తెలిపాడు.
"బుమ్రా, షమీ ఇక మూడో పేసర్గా సైనీ, ఉమేశ్, సిరాజ్ ఎవరైనా గానీ.. వీరికి ఆసీస్ టాప్ ఆర్డర్ బ్యాట్స్మెన్ను కట్టడి చేయగలిగే సత్తా ఉంది. దీనిపై నాకు పూర్తి విశ్వాసం ఉంది."
-ఆకాశ్ చోప్రా, వ్యాఖ్యత.
తొలి టెస్టుకు వార్నర్ దూరమవ్వడం ఆస్ట్రేలియా జట్టుకు తీరని లోటు అని అన్నాడు చోప్రా. "వార్నర్ లేడు. జో బర్న్స్ ఫామ్లో లేడు. విల్ పుకోవిస్కీ తలకు గాయం తగలడం వల్ల అతడు ఆడతాడో లేదో అనుమానమే. కాబట్టి ప్రత్యర్థి జట్టు టాప్ ఆర్డర్ బలహీనంగా ఉంటుంది. సులభంగానే వారిని దెబ్బతీయొచ్చు" అని అన్నాడు.
డిసెంబరు 17వ తేదీ నుంచి టెస్టు సిరీస్ ప్రారంభంకానుంది. డిసెంబర్‌ 17-21 వరకు అడిలైడ్‌లో తొలి మ్యాచ్ జరుగుతుంది. ఆ తర్వాత టెస్టులకు మెల్‌బోర్న్‌ (26-30), సిడ్నీ (జనవరి 7-11, 2021), బ్రిస్బేన్‌ (జనవరి 15-19) ఆతిథ్యమిస్తాయి.
ఇదీ చూడండి : ఆ సిరీస్ కోసం సూర్యకుమార్, ఇషాన్!
