దక్షిణాఫ్రికాతో జరిగిన తొలి వన్డేలో భారీ విజయం సాధించింది మహిళా టీమిండియా. వడోదర వేదికగా బుధవారం జరిగిన పోరులో... ప్రియ పునియా, జెమినా రోడ్రిగ్స్ అర్ధశతకాలతో రాణించారు. ఫలితంగా 8 వికెట్ల తేడాతో గెలుపొందింది భారత జట్టు. మూడు వన్డేల సిరీస్లో 1-0 ఆధిక్యంలోకి దూసుకెళ్లింది.
అరంగేట్రంలోనే అదుర్స్...
వన్డేల్లో అరంగేట్రం చేసిన ప్రియ పునియా... మొదటి మ్యాచ్లోనే దుమ్ములేపింది. 124 బంతుల్లో 75 పరుగులు చేసింది. ఇందులో ఎనిమిది బౌండరీలు ఉన్నాయి. మరో బ్యాట్స్ఉమన్ జెమీమా రోడ్రిగ్స్ 65 బంతుల్లో 55 పరుగులతో మంచి సహాకారం అందించింది.
ఈ మ్యాచ్లో టాస్ గెలిచి తొలుత బ్యాటింగ్ ఎంచుకున్న దక్షిణాఫ్రికా మహిళల జట్టు... 45.1 ఓవర్లలో 164 పరుగులకే ఆలౌటైంది. మ్యాచ్ ఆరంభంలోనే సఫారీ జట్టుకు గోస్వామి ఊహించని షాకిచ్చింది. తొలి ఓవర్‌ తొలి బంతికే లిజాలే లీ(0) ఔట్ చేసింది. 56 పరుగులకే మూడు కీలక వికెట్లు కోల్పోయి కష్టాల్లో పడిన సఫారీ జట్టును.... లారా వోల్వార్ట్(39), త్రిషా శెట్టి(14) ఆదుకున్నారు. మళ్లీ భారత బౌలర్లు చెలరేగడం వల్ల 164 పరుగులకే ఆలౌటైంది ప్రొటీస్ జట్టు. భారత బౌలర్లలో జులాన్ గోస్వామి(3/33), శిఖా పాండే(2/38), ఏక్తా బిస్త్(2/8), పూనం యాదవ్(2/33) సత్తా చాటారు.
అనంతరం 165 పరుగుల లక్ష్యాన్ని 41.4 ఓవర్లలోనే ఛేదించింది భారత మహిళల జట్టు. గాయం కారణంగా దూరమైన స్మృతి మంధాన స్థానంలో బరిలోకి దిగింది ప్రియ పునియా. తొలి మ్యాచ్లోనే అర్ధసెంచరీతో ఆకట్టుకుంది. ఇప్పటివరకు కేవలం మూడు టీ20లు మాత్రమే ఆడిందీ 23 ఏళ్ల జైపూర్‌ క్రీడాకారిణి.
