కరోనా వల్ల బీసీసీఐ ఖర్చులను తగ్గించుకునే చర్యలను చేపట్టింది. ఈ నేపథ్యంలో ఐపీఎల్ 13వ సీజన్ ఛాంపియన్స్ ప్రైజ్ మనీలో యాభై శాతం కోత విధించనుంది. గతేడాదితో పోలిస్తే నగదు బహుమతి సగానికి తగ్గించాలని బీసీసీఐ నిర్ణయం తీసుకుంది. ఈ మేరకు అన్ని ఫ్రాంచైజీలకు సమాచారం ఇచ్చినట్లు బోర్డు వర్గాలు స్పష్టం చేశాయి.
ఖర్చులను తగ్గించుకునే చర్యల్లో భాగంగా నగదు బహుమతులను సవరించినట్లు బీసీసీఐ తన నోటిఫికేషన్లో తెలిపింది. ఈ సీజన్ ఛాంపియన్స్కు ఇచ్చే రూ.20 కోట్లను రూ.10 కోట్లకు కుదించింది. రన్నరప్ ప్రైజ్మనీని 12.5 కోట్ల నుంచి రూ.6.25 కోట్లకు తగ్గించింది. క్వాలిఫయర్స్లో ఓటమి పాలైన రెండు జట్లకు రూ. 4.375 కోట్లు ఇవ్వనుంది.
ఫ్రాంచైజీలు ఆర్థికంగా మంచి స్థితిలో ఉన్నాయని, ఆదాయాన్ని సమకూర్చుకోవడానికి వాటికి స్పాన్సర్ షిప్ వంటి పలు మార్గాలున్నాయని తెలిపాయి బీసీసీఐ వర్గాలు. అందువల్ల నగదు బహుమతి కోతపై ఈ నిర్ణయం తీసుకున్నట్లు వెల్లడించాయి.
ఇదీ చూడండి 'ఐపీఎల్కు కరోనా బీమా వర్తించదు'
