భారత్-పాకిస్థాన్ దాయాది జట్ల మధ్య ద్వైపాక్షిక సిరీస్లు జరిగితే అది ప్రపంచ క్రికెట్‌కు మంచిదని పాకిస్థాన్ క్రికెట్‌ బోర్డు ఛైర్మన్‌ ఎహ్‌సన్‌ మణి అభిప్రాయపడ్డారు. తాజాగా క్రిక్‌బజ్ చేసిన ఇంటర్వ్యూలో ఈ విషయాన్ని వెల్లడించారు.
"భారత్-పాక్ మ్యాచ్‌కు ప్రపంచవ్యాప్తంగా మంచి ఆదరణ ఉంది. ఈ మ్యాచ్‌లకు అత్యధిక వీక్షకులు ఉంటారు. ఐసీసీ లేదా ఏసీసీ ఈవెంట్లలో తప్ప ఇరు జట్లు ద్వైపాక్షిక క్రికెట్‌ ఆడటం లేదు. దాయాది జట్లు తలపడితే అది ప్రపంచ క్రికెట్‌కు చాలా మంచిది. అయితే, మేం మాత్రం భారత్‌తో ఆడాలనే ప్రణాళికలు రూపొందించడం లేదు. కానీ కొన్ని బోర్డులు తమ తాత్కాలిక ఉద్దేశాలను పక్కనపెట్టి ఆట మంచి కోసం కృషిచేయాలి."
-ఎహ్‌సన్‌, పాకిస్థాన్ క్రికెట్‌ బోర్డు ఛైర్మన్‌.
ఇంతకుముందే పాక్ దిగ్గజ బౌలర్లు వకార్‌ యూనిస్‌, షోయబ్‌ అక్తర్‌ సైతం ఇరు జట్ల మధ్య ద్వైపాక్షిక క్రికెట్‌ జరగాలని ఆకాంక్షించారు.
2013 జనవరిలో పాక్ జట్టు భారత్‌లో రెండు టీ20లు, మూడు వన్డేలు ఆడింది. అప్పటి నుంచీ ఇరు జట్ల మధ్య ఎలాంటి ద్వైపాక్షిక సిరీస్లు జరగలేదు. కేవలం ఐసీసీ, లేదా ఆసియా కప్‌ల సందర్భంగానే తలపడుతున్నాయి. ఇక 2007-2008 సీజన్‌లో ఇరు జట్లు చివరి సారి టెస్టు సిరీస్ ఆడాయి.
ఇది చూడండి : 'క్రీడల పునఃప్రారంభానికి ప్లాన్ సిద్ధం చేస్తున్నాం'
