బంగ్లాదేశ్‌పై టెస్టు సిరీస్ గెలిచిన టీమిండియాపై ప్రశంసల వర్షం కురిపించాడు ప్రధాన కోచ్ రవిశాస్త్రి. ముఖ్యంగా భారత పేసర్ల ప్రదర్శన అద్భుతమని కొనియాడాడు. వ్యక్తిగత ప్రదర్శన కంటే సమష్టిగా రాణించడం వల్లే టీమిండియా విజయవంతమైందని చెప్పుకొచ్చాడు. వికెట్లను పడగొట్టాలనే కసి కారణంగానే భారత్ అద్భుతమైన విజయాలు సాధిస్తుందన్నాడు.
" ప్రత్యర్థి జట్టుపై ఒత్తిడి పెంచడమే లక్ష్యంగా పేసర్లు చెలరేగిపోతున్నారు. ఇందువల్లే మంచి ఫలితాలు వస్తున్నాయి. భారత బౌలింగ్ దళం ప్రపంచ అత్యుత్తమ స్థాయికి ఎదగడం ఆనందకరం. ఆటగాళ్ల ప్రదర్శన చూస్తే గర్వంగా ఉంది. జట్టు ఇంత బలంగా తయారవడానికి చాలా సమయం పట్టింది.15 నెలల నుంచి విదేశీ గడ్డపై సిరీస్లు ఆడాం. అక్కడ చేసిన తప్పుఒప్పులతో ఆటగాళ్లు పాఠాలు నేర్చుకున్నారు. ఇప్పుడు అదే సత్ఫలితాలను ఇస్తోంది. పిచ్‌ పరిస్థితిని తొందరగా అర్థం చేసుకుంటున్నారు. పింక్‌ బాల్‌ టెస్టులో పిచ్‌ను కచ్చితంగా అంచనా వేశారు".
-- రవిశాస్త్రి, భారత కోచ్
కోహ్లీ సేన గురించి మాట్లాడిన రవిశాస్త్రి... బంగ్లా జట్టుకు ఓ సలహా ఇచ్చాడు. విదేశాల్లో విజయాలు సాధించాలంటే బౌలింగ్ విభాగాన్ని మరింత పటిష్ఠంగా మార్చుకోవాలని సూచించాడు. పదునైన పేస్ బౌలింగ్ లేకపోవడం వల్లే... స్వదేశంలో తిరుగులేని జట్టుగా ఉన్న బంగ్లాదేశ్ విదేశీ పిచ్‌లపై విఫలమవుతుందని అన్నాడు.
