ఐసీసీ టీ20 టీమ్ ర్యాంకింగ్స్లో టీమ్ఇండియా రెండోస్థానానికి దూసుకెళ్లింది. ఇప్పటికే టెస్టుల్లో వరల్డ్ నంబర్వన్ జట్టుగా కొనసాగుతోన్న కోహ్లీసేన.. వన్డేల్లోనూ రెండో ర్యాంకుకు చేరుకుంది. ఇటీవలే న్యూజిలాండ్తో జరిగిన టీ20 సిరీస్లో ఆస్ట్రేలియా ఓటమి కారణంగా.. ఆసీస్ జట్టు మూడో స్థానానికి పడిపోయింది. దీంతో టీ20 టీమ్ ర్యాంకింగ్స్లో భారత్ రెండో స్థానానికి ఎగబాకింది.
అయితే ఈ జాబితాలో ఇంగ్లాండ్ జట్టు తొలిస్థానంలో కొనసాగుతోంది. ఇంగ్లాండ్, భారత్ మధ్య ఏడు పాయింట్ల వ్యత్యాసం ఉండడం గమనార్హం. ఈ నేపథ్యంలో త్వరలోనే జరిగే టీ20 సిరీస్లో కోహ్లీసేన నెగ్గితే.. టీమ్ఇండియా అగ్రస్థానానికి చేరే అవకాశం ఉంది.
టెస్టు ర్యాంకింగ్స్..
ఇంగ్లాండ్తో జరిగిన టెస్టు సిరీస్లో అద్భుతమైన బ్యాటింగ్తో ఆకట్టుకున్న రిషబ్ పంత్.. ఐసీసీ టెస్టు బ్యాటింగ్ ర్యాంకింగ్స్లో టాప్-10లో అడుగుపెట్టాడు. ఏకంగా 7 స్థానాలు మెరుగు పరచుకొని 9వ ర్యాంక్కు చేరుకున్నాడు. మరోవైపు కెప్టెన్ విరాట్ కోహ్లీ ఐదో స్థానంలో కొనసాగుతున్నాడు. ఈ జాబితాలో న్యూజిలాండ్ కెప్టెన్ కేన్ విలియమ్సన్ అగ్రస్థానంలో కొనసాగుతున్నాడు.
బౌలింగ్ ర్యాంకుల్లో టీమ్ఇండియా స్పిన్నర్ రవిచంద్రన్ అశ్విన్ రెండో స్థానానికి చేరుకోగా.. పేసర్ జస్ప్రీత్ బుమ్రా ఒక స్థానాన్ని కోల్పోయి పదో ర్యాంకులో ఉన్నాడు. ఈ జాబితాలో ఆస్ట్రేలియాకు చెందిన పేసర్ పాట్ కమిన్స్ అగ్రస్థానంలో ఉన్నాడు.
ఆల్రౌండర్ల జాబితాలోని మూడో స్థానంలో రవీంద్ర జడేజా ఉండగా.. స్పిన్నర్ రవిచంద్రన్ అశ్విన్ నాలుగో ర్యాంక్కు చేరుకున్నాడు. అయితే ఈ జాబితాలోని అగ్రస్థానంలో వెస్టిండీస్ కెప్టెన్ జాసన్ హోల్డర్ కొనసాగుతున్నాడు.
టీ20 ర్యాంకింగ్స్..
టీ20 ఫార్మాట్లో బ్యాటింగ్ ర్యాంకులను అంతర్జాతీయ క్రికెట్ మండలి(ఐసీసీ) బుధవారం విడుదల చేసింది. ఇందులో టీమ్ఇండియా ఓపెనర్ కేఎల్ రాహుల్ ఒక స్థానాన్ని కోల్పోయి మూడో ర్యాంకుకు చేరుకోగా.. కెప్టెన్ విరాట్ కోహ్లీ ఆరో స్థానంలో కొనసాగుతున్నాడు. అయితే టీ20 బౌలింగ్, ఆల్రౌండర్ల జాబితాలోని టాప్-10లో ఒక్క భారత ఆటగాడు లేకపోవడం గమనార్హం.
ఇదీ చూడండి: డబ్ల్యూటీసీ ఫైనల్లో ప్రేక్షకులకు అనుమతి
