ఇండియన్ ప్రీమియర్ లీగ్-13వ సీజన్ గురించి మాట్లాడాడు బీసీసీఐ అధ్యక్షుడు సౌరభ్ గంగూలీ. ఈ మెగాటోర్నీ జరగకుండా ఈ ఏడాది ముగియదని చెప్పాడు. కచ్చితంగా లీగ్ జరిగి తీరుతుందని అన్నాడు. దేశంలో కరోనా విజృంభిస్తోన్న నేపథ్యంలో టోర్నీని విదేశాల్లో నిర్వహించే అవకాశం ఉందని ఇటీవల ఓ బీసీసీఐ అధికారి అన్నారు. ఈ నేపథ్యంలో స్పందించిన దాదా.. భారత్ తమ తొలి ప్రాధాన్యమని, ఆ తర్వాతే విదేశాల్లో అని పేర్కొన్నాడు.
"ఈ ఏడాది ఐపీఎల్ కచ్చితంగా జరుగుతుంది. భారత్లో నిర్వహించడమే మా తొలి ప్రాధాన్యత. 35-40 రోజుల సమయం దొరికినా టోర్నీని నిర్వహిస్తాం. కానీ ఎక్కడనేది మాత్రం ఇప్పుడే చెప్పలేం"
-గంగూలీ, బీసీసీఐ అధ్యక్షుడు
ఐసీసీ నిర్ణయం తర్వాతే
ఆస్ట్రేలియాలో ఈ ఏడాది అక్టోబర్-నవంబరులో జరగాల్సిన టీ20 ప్రపంచకప్ నిర్వహణపై సందేహాలు ఉన్నాయి. ఇప్పటికే జరపలేమని ఆసీస్ బోర్డు సంకేతాలు ఇచ్చినా సరే, అంతర్జాతీయ క్రికెట్ మండలి స్పందించలేదు. అయితే ఐసీసీ, దీనిపై నిర్ణయం తీసుకున్న తర్వాతే ఐపీఎల్ నిర్వహణ తేదీ ప్రకటిస్తామని అన్నాడు గంగూలీ.
బీసీసీఐ అంగీకరిస్తే, తమ దేశంలో ఐపీఎల్ను నిర్వహించేందుకు సిద్ధంగా ఉన్నామని యూఏఈ, శ్రీలంక, న్యూజిలాండ్లు ఆఫర్ చేశాయి.
ఇది చూడండి : 143 ఏళ్ల టెస్టు క్రికెట్ చరిత్రలో తొలిసారి అలా
