ఆస్ట్రేలియా-ఎ జట్టుతో జరుగుతోన్న ప్రాక్టీస్ మ్యాచ్లో భారత్ మెరుగైన ప్రదర్శన కనబరుస్తోంది. తొలి ఇన్నింగ్స్లో 86 పరుగుల ఆధిక్యంలో నిలిచిన టీమ్ఇండియా రెండో ఇన్నింగ్స్లోనూ సత్తాచాటుతోంది. ప్రస్తుతం రెండో రోజు ఆటముగిసే సమయానికి 4 వికెట్ల నష్టానికి 386 పరుగుల భారీ స్కోర్ సాధించింది.
తొలి ఇన్నింగ్స్లో 86 పరుగుల ఆధిక్యంతో రెండో ఇన్నింగ్స్ ప్రారంభించిన భారత్ సత్తాచాటింది. ఓపెనర్ పృథ్వీ షా 3 పరుగులకే ఔటైనా.. మరో ఓపెనర్ మయాంక్ అగర్వాల్ (61), శుభ్మన్ గిల్ (65) రెండో వికెట్కు 104 పరుగుల భాగస్వామ్యం నెలకొల్పారు. రహానే 38 పరుగులు చేసి పెవిలియన్ చేరాడు. తర్వాత హనుమ విహారీ, రిషబ్ పంత్ ఆస్ట్రేలియా బౌలర్లను సమర్థవంతంగా ఎదుర్కొన్నారు. ఈ క్రమంలో వీరిద్దరూ సెంచరీలు సాధించారు. ప్రస్తుతం రెండో రోజు ఆట ముగిసే సమయానికి విహారీ 104, పంత్ 103 పరుగులతో క్రీజులో ఉన్నారు. భారత్ 4 వికెట్ల నష్టానికి 386 పరుగులతో పటిష్ఠ స్థితిలో ఉంది. ప్రస్తుతం ఆసీస్ ముందు 472 పరుగుల ఆధిక్యంలో నిలిచింది.
ఈ మ్యాచ్లో తొలుత టాస్ గెలిచి బ్యాటింగ్‌ ఎంచుకున్న భారత్ తొలి ఇన్నింగ్స్లో 194 పరుగులకు ఆలౌటైంది. శుభ్మన్ గిల్ (43), పృథ్వీ షా (40) మినహా మిగిలిన బ్యాట్స్మెన్ తేలిపోయిన వేళ బుమ్రా (55*) బ్యాటుతో ఆకట్టుకున్నాడు. అజేయ అర్ధశతకంతో సత్తాచాటాడు. ఫస్ట్‌ క్లాస్‌ మ్యాచ్లో అతడికి ఇదే తొలి అర్ధశతకం. అయితే బుమ్రా సిక్సర్‌తో ఈ ఘనత సాధించడం విశేషం. 123 పరుగులకే తొమ్మిది వికెట్లు కోల్పోయి కష్టాల్లో ఉన్న జట్టును సిరాజ్‌ (22)తో కలిసి బుమ్రా ఆదుకున్నాడు. ఆఖరి వికెట్కు 71 పరుగులు జోడించాడు.
అనంతరం బరిలోకి దిగిన ఆస్ట్రేలియా-ఎ.. 108 పరుగులకే కుప్పకూలింది. షమీ (3/29), సైనీ (3/19), బుమ్రా (2/33) మెరిశారు. సిరాజ్‌ ఓ వికెట్ తీశాడు. ఆసీస్ ఇన్నింగ్స్లో అలెక్స్‌ కేరీ (32), హ్యారిస్‌ (26) ఎక్కువ పరుగులు చేశారు. భారత బౌలర్ల ధాటికి ఆ జట్టులో నలుగురు బ్యాట్స్మెన్ ఖాతా తెరవకముందే పెవిలియన్‌కు చేరారు. ఈ మ్యాచ్లో కోహ్లీ, పుజారా, కేఎల్ రాహుల్‌ ఆడలేదు. పంత్ వికెట్ కీపింగ్ బాధ్యతలు అందుకోగా సాహా ఫీల్డింగ్ చేశాడు.
