టీ20ల్లో కోహ్లీ కెప్టెన్సీ రికార్డు ఎలా ఉందంటే?

ఆస్ట్రేలియాతో జరిగిన వన్డే సిరీస్​ను చేజార్చుకుంది టీమ్ఇండియా. ఆఖరి మ్యాచ్​లో గెలిచి వైట్​వాష్ నుంచి తప్పించుకుంది. దీంతో టీ20ల్లో అయినా గెలవాలన్న పట్టుదలతో బరిలో దిగుతోంది. ఈ నేపథ్యంలో టీ20 ఫార్మాట్లో కోహ్లీ కెప్టెన్సీ రికార్డు ఎలా ఉందో తెలుసుకుందాం.

ఆస్ట్రేలియా గడ్డపై జరిగిన వన్డే సిరీస్​లో కొద్దిలో వైట్ వాష్​ నుంచి తప్పించుకున్న టీమ్​ఇండియా ప్రస్తుతం టీ20 సిరీస్​పై కన్నేసింది. వన్డేల్లో ఓటమికి ప్రతీకారం తీర్చుకోవాలన్న పట్టుదలతో ఉంది. అయితే వన్డే సిరీస్​లో ఓడినందుకు కెప్టెన్ విరాట్ కోహ్లీపై ఒత్తిడి కొంచెం ఎక్కువగానే ఉంది. మొదటి రెండు వన్డేల్లో ఓటమితో విమర్శల పాలైన కోహ్లీ.. టీ20 సిరీస్​లో గెలుపుతో తన కెప్టెన్సీ సత్తాను చూపించాలని తహతహలాడుతున్నాడు. ఈ నేపథ్యంలో టీ20ల్లో కోహ్లీ కెప్టెన్సీ రికార్డు ఎలా ఉందో తెలుసుకుందాం.

గెలుపు-ఓటములు

విరాట్ ఇప్పటివరకు 37 టీ20ల్లో భారత జట్టుకు కెప్టెన్​గా వ్యవహరించాడు. ఇందులో భారత్ 24 మ్యాచ్​లు గెలవగా 11 ఓడిపోయింది. రెండు మ్యాచ్​ల్లో ఫలితం తేలలేదు. టీ20ల్లో కోహ్లీ విజయ శాతం 64.86తో మెరుగ్గా ఉంది. అలాగే ఈ 37 మ్యాచ్​ల్లో బ్యాట్స్​మన్​గా కోహ్లీ 43.73 సగటుతో 1137 పరుగులు చేశాడు.

ఆస్ట్రేలియాపై

ఓవరాల్​గా టీ20ల్లో కోహ్లీకి మంచి రికార్డున్నా.. ఆస్ట్రేలియాపై మాత్రం గణాంకాలు ఏమాత్రం బాగాలేవు. ఆసీస్​తో జరిగిన ఏడు మ్యాచ్​లకు కెప్టెన్​గా వ్యవహరించిన కోహ్లీ ఇందులో కేవలం రెండింటిలోనే సానుకూల ఫలితాన్ని పొందాడు. నాలుగు మ్యాచులు ఓడిపోగా.. ఒకటి ఫలితం తేలలేదు. కంగారూ జట్టుపై కోహ్లీ విజయ శాతం 28.57గా ఉంది. అలాగే బ్యాట్స్​మన్​గా కోహ్లీ ఈ 7 మ్యాచ్​ల్లో 61 సగటుతో 183 పరుగులు చేశాడు.

ఆస్ట్రేలియా గడ్డపై

ఆస్ట్రేలియా గడ్డపై మూడు టీ20లకు సారథ్యం వహించాడు కోహ్లీ. ఇందులో ఒక మ్యాచ్​ గెలవగా ఒక మ్యాచ్ ఓటమిపాలైంది. మరో మ్యాచ్ ఫలితం తేలలేదు.