భారత్లో కరోనా ప్రభావం అంతకంతకు పెరుగుతుండటం వల్ల ఇప్పటికే చాలా కార్యక్రమాలు, క్రీడాపోటీల్ని రద్దు చేశారు. దీనితోపాటే లాక్డౌన్ను మే 3వరకు పెంచుతూ కేంద్రం నిర్ణయం తీసుకుంది. తొలుత ఐపీఎల్ను కొన్ని రోజుల తర్వాత జరపాలని బీసీసీఐ భావించింది. వైరస్ వ్యాప్తి ఎక్కువవుతుండటం వల్ల టోర్నీని నిరవధిక వాయిదా వేస్తున్నట్లు చెప్పింది. దీంతో ధోనీ కెరీర్ సందిగ్ధంలో పడింది. ఇదే విషయంపై మాట్లాడిన క్రికెట్ సలహా మండలి సభ్యుడు మదన్లాల్.. ఈ లీగ్ జరగకపోతే మహీకి ఉన్న సమస్యలు ఎక్కువవుతాయని అన్నాడు.
"కెరీర్ పరంగా ధోనీ ఇప్పటికే ఇబ్బందుల్లో ఉన్నాడు. వన్డే ప్రపంచకప్ తర్వాత కనీసం ఒక్క మ్యాచ్ అయినా ఆడలేదు. ఐపీఎల్ ప్రస్తుత సీజన్ జరగకపోతే అతడి రీఎంట్రీ సమస్యలు మరింత పెరుగుతాయి. టీమిండియా కెప్టెన్ కోహ్లీ, కోచ్ రవిశాస్త్రి, మేనేజ్మెంట్.. ఈ విషయంలో ఏం ఆలోచిస్తున్నారో తెలియట్లేదు" -మదన్లాల్, సీఏసీ సభ్యుడు
గతేడాది జరిగిన ప్రపంచకప్ తర్వాత తాత్కాలిక విరామం ప్రకటించిన ధోనీ.. ఆ తర్వాత జట్టుకు పూర్తిగా దూరమయ్యాడు. ఈ కారణంతో అతడిని, బీసీసీఐ వార్షిక కాంట్రాక్టు నుంచి తప్పించింది. అయితే ఐపీఎల్లో మెరుగైన ప్రదర్శన చేసి, టీమిండియాలోకి పునరాగమనం చేయాలనుకున్నాడు మహీ. కానీ ఇప్పుడు కరోనా వల్ల ఆ టోర్నీ వాయిదా పడి, మహీ కెరీర్ సందిగ్ధంలో పడింది.
