మహిళల టీ20 ప్రపంచకప్ సెమీఫైనల్లో తలపడే జట్లు ఖరారయ్యాయి. తొలి సెమీఫైనల్లో మాజీ ఛాంపియన్‌ ఇంగ్లాండ్‌ను భారత్... రెండో సెమీఫైనల్లో డిఫెండింగ్‌ ఛాంపియన్‌ ఆస్ట్రేలియాతో దక్షిణాఫ్రికా ఢీకొంటాయి. ఈ రెండు మ్యాచ్లు సిడ్నీ వేదికగా గురువారం జరగనున్నాయి. వీటికి ఆతిథ్యమివ్వబోతున్న సిడ్నీని వరుణుడు ముంచెత్తే అవకాశముందని అక్కడి వాతావరణ శాఖ భావిస్తోంది.
మంగళవారం.. గ్రూప్‌-బిలో ఇక్కడే జరిగిన చివరి రెండు మ్యాచ్లు వర్షం వల్ల రద్దయ్యాయి. సెమీస్లోనూ సిడ్నీలో వర్షం పడుతుందని, మ్యాచ్లు సజావుగా సాగడం సందేహమేనని సమాచారం. ఒకవేళ వర్షంతో మ్యాచ్లు రద్దయితే.. గ్రూప్‌ దశను అగ్రస్థానాలతో ముగించిన భారత్, దక్షిణాఫ్రికాలు ఫైనల్ చేరుతాయి. ఇంగ్లాండ్, ఆస్ట్రేలియా నిష్క్రమిస్తాయి. ఈనెల 8న మెల్బోర్న్లో టైటిల్ పోరు జరగనుంది.
ఆస్ట్రేలియా ప్రతిపాదన తిరస్కరణ
సెమీఫైనల్లో 'రిజర్వ్ డే' పెట్టాలన్న ఆస్ట్రేలియా బోర్డు వినతిని, తాజాగా తోసిపుచ్చింది అంతర్జాతీయ క్రికెట్ మండలి. ప్రణాళిక ప్రకారం ముందుగా ప్రకటించిన తేదీల్లోనే మ్యాచ్లు జరుగుతాయని, మరో రోజును కేటాయించడం కుదరదని స్పష్టం చేసింది. ఈ ఏడాది అక్టోబరులో పురుషుల టీ20 ప్రపంచకప్నకు ఇదే నిబంధన వర్తించనుంది.
గతేడాది వన్డే ప్రపంచకప్లో వర్షం కారణంగా భారత్-న్యూజిలాండ్ సెమీస్ మ్యాచ్ తర్వాతి రోజు నిర్వహించారు. ఇందులో వాతావరణం టీమిండియాకు ప్రతికూలంగా మారడం వల్ల టోర్నీలో ఓడిపోయి నిష్క్రమించింది.
