గతేడాది జరిగిన పురుషుల వన్డే ప్రపంచకప్ ఫైనల్లో న్యూజిలాండ్పై సున్నా పరుగుల తేడాతో గెలిచింది ఇంగ్లాండ్. ఆ మ్యాచ్లో తొలుత స్కోర్లు సమం కాగా.. సూపర్ ఓవర్ నిర్వహించారు. ఇందులోనూ పరుగులు సమానం కావడం వల్ల బౌండరీ కౌంట్ ఆధారంగా ఇంగ్లీష్ జట్టు తొలిసారి కప్పు గెలిచింది. అయితే అప్పుడు ఐసీసీ నిబంధనల కారణంగా విజేతగా నిలిచిన ఇంగ్లాండ్... నేడు అదే రూల్ కారణంగా మహిళా ప్రపంచకప్లో ఓటమి మూటగట్టుకుంది.
ఇంగ్లాండ్ ఇలా ఇంటికి...
ఆస్ట్రేలియాలో జరుగుతున్న ఐసీసీ మహిళా టీ20 ప్రపంచకప్లో టీమిండియా తొలిసారి ఫైనల్ చేరింది. భారత్ X ఇంగ్లాండ్ జట్ల మధ్య జరగాల్సిన తొలి సెమీఫైనల్‌ వర్షం కారణంగా రద్దయింది. ఫలితంగా పాయింట్ల పట్టికలో అగ్రస్థానంలో ఉన్న హర్మన్‌ప్రీత్‌సేన సెమీస్ ఆడకుండానే నేరుగా తుది పోరుకు అర్హత సాధించింది. గత టీ20 ప్రపంచకప్ సెమీస్లో ఇంగ్లాండ్ చేతిలో ఓటమిపాలై టోర్నీ నుంచి నిష్క్రమించింది టీమిండియా.
ప్రస్తుత టోర్నీలో భారత్ గ్రూప్‌-ఎలో వరుసగా నాలుగు లీగ్ మ్యాచ్‌లు గెలిచి 8 పాయింట్లతో అగ్రస్థానంలో నిలిచింది. మరోవైపు గ్రూప్‌-బిలో ఇంగ్లాండ్ 6 పాయింట్లతో రెండో స్థానంలో నిలిచింది. ఫలితంగా సెమీఫైనల్స్‌లో ఈ రెండు జట్లు తలపడాల్సి వచ్చింది. అయితే ఈ రెండు జట్ల మధ్య జరగాల్సిన తొలి సెమీస్ రద్దవ్వడం వల్ల లీగ్ దశలో ఎక్కువ పాయింట్లు సాధించిన హర్మన్‌ప్రీత్‌ జట్టు ఫైనల్స్‌కు చేరింది. రన్‌రేట్‌ పరంగా ఇంగ్లాండ్ (+2.291), భారత్(+0.097) కన్నా మెరుగ్గా ఉండటం గమనార్హం. లీగ్ల్లో ఒక్క మ్యాచ్ ఓడినా భారత్ ఇంటికి వెళ్లిపోయేది.
ఇదీ చూడండి.. భారత్-ఇంగ్లాండ్ మ్యాచ్ రద్దు.. ఫైనల్కు హర్మన్సేన
