న్యూజిలాండ్తో జరిగిన వన్డే సిరీస్ను 0-3 తేడాతో కోల్పోయింది టీమిండియా. ఈ సిరీస్లో ఓపెనర్లుగా అరంగేట్రం చేసిన పృథ్వీ షా, మయాంక్ అగర్వాల్ తమ ప్రతిభ చూపెట్టుకోలేకపోయారు. పృథ్వీ మోస్తారుగా రాణించినా భారీ స్కోర్లు సాధించడంలో విఫలమయ్యాడు.
చివరిదైన మూడో వన్డేలో పృథ్వీ 42 బంతుల్లో 40 పరుగులు చేసి మంచి ఫామ్లో కనిపించాడు. ఇందులో మూడు ఫోర్లు, రెండు సిక్సులు ఉన్నాయి. కానీ అదే సమయంలో రెండో పరుగుకు ప్రయత్నించి రనౌట్గా వెనుదిరిగాడు. దీనిపై వ్యాఖ్యాత ఆకాశ్ చోప్రా స్పందిస్తూ.. అక్కడ సులువుగా రెండో పరుగు వస్తుందని కానీ షా ఫిట్నెస్ అందుకు తగ్గట్టుగా లేదని కామెంట్ చేశాడు.
"అక్కడ రెండో పరుగు సులువుగా వస్తుంది. ఆ పరుగు కోసం పృథ్వీనే ప్రయత్నించాడు. కానీ రనౌట్గా వెనుదిరగడం ఆశ్చర్యంగా అనిపించింది. బంతిని బాదే ప్రత్యేకమైన ప్రతిభ షా సొంతం. కానీ ఫిట్నెస్పై మరింత శ్రద్ధ పెట్టాలి."
-ఆకాశ్ చోప్రా, వ్యాఖ్యాత
ఫిబ్రవరి 21న ప్రారంభమయ్యే టెస్టు సిరీస్ కోసం పృథ్వీ రెండో ఓపెనర్ బరిలో ఉన్నాడు. ఇతడితో పాటు శుభమన్ గిల్ కూడా పోటీపడుతున్నాడు. మరి షాకు ఈ సిరీస్లో అవకాశం వస్తుందో లేదో చూడాలి.
