హర్భజన్ తమ జట్టుతో చేరడం వల్ల స్పిన్ విభాగం బలోపేతమవుతుందని తెలిపాడు కోల్కతా నైట్ రైడర్స్ కెప్టెన్ ఇయాన్ మోర్గాన్. అన్ని ఫ్రాంఛైజీల్లో కెల్లా తమ టీమ్లోనే అత్యుత్తమ స్పిన్నర్లు ఉన్నారని వెల్లడించాడు. 'మేము చెన్నైలో ఆడనున్నాం. అక్కడ పిచ్ స్పిన్కు అనుకూలంగా ఉంటుంది. మా స్పిన్నర్లు బాగా బౌలింగ్ చేస్తే.. మేము టోర్నీలో ముందంజలో ఉన్నట్లే' అని మోర్గాన్ పేర్కొన్నాడు.
చెన్నై మొత్తం మూడు సార్లు ట్రోఫీ సాధించగా.. అందులో రెండు సార్లు సీఎస్కే తరఫున ఆడిన అనుభవం భజ్జీ సొంతం. అలాంటిది ప్రస్తుత సీజన్ తొలి రౌండ్ వేలంలో భజ్జీని ఏ ఫ్రాంఛైజీ కొనుగోలు చేయలేదు. రెండో రౌండ్లో బేస్ ప్రైజ్కు దక్కించుకుంది కోల్కతా జట్టు.
భారత్తో వన్డే సిరీస్కు, ఐపీఎల్కు మధ్య తగినంత ఖాళీ సమయం ఉండడం తనకు కలిసొచ్చిందని తెలిపాడు మోర్గాన్. గాయం నుంచి కోలుకోవడానికి ఈ సమయం ఉపయోగపడిందని పేర్కొన్నాడు.
మోర్గాన్ బొటన వేలుకు, చూపుడు వేలుకు మధ్య చీలిక వచ్చింది. దీంతో, టీమ్ఇండియాతో చివరి రెండు వన్డేలకు దూరమయ్యాడు.
ఇటీవల ఇంగ్లాండ్పై అరంగేట్రం చేసిన యువ బౌలర్ ప్రసిధ్ కృష్ణ.. మోర్గాన్ కెప్టెన్సీలోనే ఐపీఎల్లో ఆడనున్నాడు. 'ఆరోజు మ్యాచ్ టాస్ వేయగానే ప్రసిధ్ దగ్గరికి వెళ్లి అభినందించా. అరంగేట్ర అంటే కేవలం ప్రారంభ మ్యాచ్ మాత్రమే కాదు. అది వారి కుటుంబానికి, సన్నిహితులకు, మిత్రులకు, ఆ ఆటగాడికి ప్రత్యేక సందర్భం' అని మోర్గాన్ పేర్కొన్నాడు.
ఇదీ చదవండి: ఐపీఎల్ 2021: చెన్నై చేరుకున్న రోహిత్ సేన
